കൊല്ലം: മോഷണങ്ങള് വര്ധിക്കുന്ന സാഹചര്യത്തില് സിറ്റി പരിധിയില് രാത്രികാല പൊലീസ് പട്രോളിങ് ശക്തമാക്കി. ലോക്ഡൗണ് ഇളവുകള് പ്രഖ്യാപിച്ചതോടെ സാമൂഹികവിരുദ്ധശല്യം വര്ധിച്ച പശ്ചാത്തലത്തിലാണ് രാത്രികാല പൊലീസ് വിന്യാസം ശക്തിപ്പെടുത്തുന്നതെന്ന് സിറ്റി പൊലീസ് കമീഷണര് ടി. നാരായണന് അറിയിച്ചു. ലോക്ഡൗണ് ഇളവുകളെതുടര്ന്ന് സാമൂഹികവിരുദ്ധ ശല്യവും മോഷണവും റിപ്പോര്ട്ട് ചെയ്യപ്പെടുന്ന സാഹചര്യത്തിലാണ് രാത്രികാലത്തുള്ള പൊലീസ് വിന്യാസം കൂടുതല് ശക്തിപ്പെടുത്താന് തീരുമാനിച്ചത്. നഗരത്തിലെ മെയിന് റോഡിലുള്ള മൊബൈല് ഫോണ് കടയില് ഇന്നലെ പുലര്ച്ച മോഷണം നടത്തിയ മൂന്നുപേരെയും സംബന്ധിച്ച് വ്യക്തമായ സൂചനകള് ലഭിച്ചിട്ടുണ്ടെന്നും ഇവര് ഉടന് പിടിയിലാകുമെന്നും സിറ്റി പൊലീസ് കമീഷണര് അറിയിച്ചു.
ഇനിമുതല് രാത്രികാലങ്ങളില് ഒരു അസി.കമീഷണറുടെയും മൂന്ന് ഇന്സ്പെക്ടര്മാരുടെയും നേതൃത്വത്തില് 30 പട്രോളിങ് സംഘങ്ങള് സിറ്റി പൊലീസ് പരിധിയില് രാത്രികാല പട്രോളിങ്ങില് ഏര്പ്പെടും. ഒരു പട്രോളിങ് സംഘത്തില് നാലുപേരുണ്ടായിരിക്കും. കൂടാതെ 16 ബൈക്ക് പട്രോളിങ് സംഘങ്ങളും നിരത്തിലുണ്ടാകും. സിറ്റി പൊലീസ് കമീഷണറുടെ ദ്രുതകര്മസേനയുടെ സേവനവും ഇവര്ക്ക് രാത്രികാലങ്ങളില് ലഭ്യമാക്കും.
ലോക്ഡൗണ് ലംഘനങ്ങള് കണ്ടെത്താന് അധികമായി സ്ഥാപിച്ച നിരീക്ഷണ ക്യാമറയിലൂടെയാണ് മോഷണ സംഘത്തെ സംബന്ധിച്ച് സൂചനകള് ലഭിച്ചത്. നഗരത്തില് സ്ഥാപിച്ചിരിക്കുന്ന സി.സി.ടി.വി കാമറകള് നിരീക്ഷിക്കുന്നതിന് പൊലീസ് കണ്േട്രാള് റൂമില് പ്രത്യേക സംഘത്തെ നിയോഗിച്ചിട്ടുണ്ട്. ഇതിനായി ദേശീയ സംസ്ഥാന പാതകളിലും നഗരത്തിലെ വിവിധ കേന്ദ്രങ്ങളിലും തെരഞ്ഞെടുത്ത സ്ഥലങ്ങളില് കാമറകള് നിരീക്ഷണത്തിനായി സ്ഥാപിച്ചു. ക്രമസമാധാന-ഗതാഗത ലംഘനങ്ങളെയും ലഹരി ഉപയോഗത്തെയും കുറിച്ചുള്ള വിവരങ്ങള് 1090, 112, 0474-27442265, 0474-2764422 എന്നീ നമ്ബരുകളില് അറിയിക്കാമെന്നും സിറ്റി പൊലീസ് കമീഷണര് അറിയിച്ചു.