ജൂണ്‍ 27 ഞായറാഴ്ചയാണ് പാകിസ്ഥാനിലെ ഇന്ത്യന്‍ ഹൈക്കമ്മീഷനില്‍ ഒരു ഡ്രോണ്‍ കണ്ടെത്തിയത്. പാക്കിസ്ഥാനെ ഇന്ത്യ ശക്തമായ പ്രതിഷേധം അറിയിച്ചു. പാക്കിസ്ഥാനിലുണ്ടായ ഗുരുതര സുരക്ഷാ വീഴ്ചയാണിത്. സുരക്ഷാ ലംഘനം ഇന്ത്യ അതീവ ഗൗരവത്തോടെയാണ് കാണുന്നതെന്ന് ഇസ്ലാമാബാദിനെ അറിയിച്ചു.ഞായറാഴ്ച പുലര്‍ച്ചെയാണ് ജമ്മു വിമാനത്താവളത്തിലെ ഇന്ത്യന്‍ വ്യോമസേന സ്റ്റേഷനില്‍ ബോംബ് പതിച്ചത്. അതിനു ശേഷം തുടര്‍ച്ചയായി ജമ്മുവിലും പരിസരങ്ങളിലും ഡ്രോണ്‍ കണ്ടതിന്റെ വിശദാംശങ്ങള്‍ പുറത്തുവന്നിട്ടുണ്ട്. പാക്കിസ്ഥാന്‍ അതിര്‍ത്തിയുമായി കേവലം 14 കിലോമീറ്റര്‍ മാത്രം വ്യോമദൂരമുള്ള സ്ഥലമാണ് ജമ്മുവിലെ വിമാനത്താവളം.
ഇതിനു ശേഷമാണ് ഇസ്ലാമാബാദിലെ ഇന്ത്യന്‍ എംബസിയിലും ഡ്രോണ്‍ കണ്ടെത്തിയ വിവരങ്ങള്‍ പുറത്തു വരുന്നത്.പാകിസ്ഥാന്‍ ആസ്ഥാനമായുള്ള തീവ്രവാദികള്‍ ഡ്രോണുകള്‍ ഉപയോഗിക്കുന്നതില്‍ വലിയ ആശങ്ക ഇന്ത്യ ഐക്യരാഷ്ട്ര സഭയിലും രേഖപ്പെടുത്തിയിരുന്നു.ഞായറാഴ്ച പുലര്‍ച്ചെ 1.40 ഓടെയാണ് വ്യോമത്താവളത്തില്‍ ഇരട്ട സ്‌ഫോടനമുണ്ടാകുന്നത്. രണ്ട് വ്യോമസേന ഉദ്യോഗസ്ഥര്‍ക്ക് പരിക്കേറ്റിരുന്നു.
അതിനുശേഷം, ജമ്മുവിലെ സുപ്രധാന സൈനിക സംവിധാനങ്ങളില്‍ ഒന്നിലധികം ഡ്രോണുകള്‍ കണ്ടെത്തി. വെള്ളിയാഴ്ച രാവിലെയും ഇന്ത്യന്‍ അതിര്‍ത്തിയില്‍ ഡ്രോണ്‍ പ്രത്യക്ഷപ്പെട്ടിരുന്നു. ഡ്രോണുകളുടെ തുടര്‍ച്ചയായ ഭീഷണി പരിഹരിക്കുന്നതിനായി ജമ്മുവിലെ വ്യോമസേനാ താവളത്തില്‍ ആന്റി ഡ്രോണ്‍ സംവിധാനവും സ്ഥാപിച്ചു.