ന്യൂഡല്‍ഹി: രാജ്യത്തു കഴിഞ്ഞ രണ്ട് മാസത്തില്‍ കൊവിഡ് സ്ഥിരീകരിക്കുന്നവരുടെ പ്രതിദിന കണക്കില്‍ ഏറ്റവും കുറവ് രേഖപ്പെടുത്തിയ ദിവസമാണിന്ന്. 1,00,636 പേര്‍ക്കാണ് ഇന്ന് രോഗം സ്ഥിരീകരിച്ചതെന്ന് കേന്ദ്ര ആരോഗ്യമന്ത്രാലയം പുറത്തിറക്കിയ റിപ്പോര്‍ട്ടില്‍ പറയുന്നു. 61 ദിവസത്തിനിടെ ഏറ്റവും ചെറിയ കണക്ക്. ഇതോടെ ആകെ രോഗം ബാധിച്ചവരുടെ എണ്ണം 2.89 കോടിയായി. 2,89,09,975 പേര്‍ക്കാണ് ഇതുവരെ രോഗം സ്ഥിരീകരിച്ചത്.
ഇന്ന് 2427പേരുടെ മരണമാണ് സ്ഥിരീകരിച്ചത്. ഇതോടെ ആകെ മരണമടഞ്ഞവര്‍ 3,49,186 ആയി. കഴിഞ്ഞ പതിനൊന്ന് ദിവസങ്ങളായി ആക്‌ടീവ് കേസുകള്‍ രണ്ട് ലക്ഷത്തില്‍ താഴെയാണെന്നത് ആശ്വാസമായി. ആകെ ആക്‌ടീവ് കേസുകള്‍ 14 ലക്ഷമാണ്. ഇന്നലെ രോഗമുക്തി നേടിയവര്‍ 1,74,399 ആണ്. ഇതോടെ ആകെ രോഗമുക്തര്‍ 2,71,59,180 ആണ്. കഴിഞ്ഞ 25 ദിവസങ്ങളിലായി രാജ്യത്ത് പ്രതിദിന രോഗബാധിതരെക്കാള്‍ മുന്നില്‍ നില്‍ക്കുന്നത് രോഗമുക്തി നേടിയവരാണ്. ശനിയാഴ്‌ച രാജ്യത്ത് 15,87,589 ടെസ്‌റ്റുകളാണ് നടത്തിയത്. ഇതോടെ ആകെ രാജ്യത്ത് നടത്തിയ ടെസ്‌റ്റുകളുടെ എണ്ണം 36.6 കോടിയാണ്. ഏപ്രില്‍-മേയ് മാസങ്ങളില്‍ നിരവധി പേരുടെ ജീവനെടുത്ത കൊവിഡ് രണ്ടാം തരംഗത്തില്‍ നിന്നും ഇന്ത്യ അതിവേഗം മുക്തമാകുന്ന കാഴ്‌ചയാണ് കഴിഞ്ഞ കുറച്ച്‌ ദിവസങ്ങളായി കാണുന്നത്. എന്നാൽ വാക്സിനേഷൻ 23 കോടി ഡോസ് വിതരണം ചെയ്‌തു കഴിഞ്ഞു. ഇപ്പോഴും പല സംസ്ഥാനങ്ങളിലും വാക്സിൻ ക്ഷാമം അനുഭവപ്പെടുന്നുണ്ട്.
