തിരുവനന്തപുരം : ലക്ഷദ്വീപ് വിഷയത്തില്‍ നിയമസഭയില്‍ പാസാക്കിയ പ്രമേയം അവിടുത്തെ ജനങ്ങള്‍ക്ക് എതിരാണെന്ന് ബിജെപി ദേശീയ ഉപാധ്യക്ഷന്‍ എ പി അബ്ദുള്ളക്കുട്ടി. പ്രമേയം കേന്ദ്ര ആഭ്യന്തര വകുപ്പിനെ കേരളം വെല്ലുവിളിക്കുകയാണെന്നും അബ്ദുള്ളക്കുട്ടി പറഞ്ഞു.
കേന്ദ്രഭരണ പ്രദേശമായ ലക്ഷദ്വീപില്‍ എന്തു പരിഷ്കരണം വരുത്തണമെന്നത് കേന്ദ്രസര്‍ക്കാരിന്റെ അധികാരമാണ്. ബിജെപി വിരോധത്തിന്റെ പേരില്‍ ഇതില്‍ കൈകടത്തുന്നത് ഭരണഘടനാ വിരുദ്ധ പ്രവര്‍ത്തനമാണ്. കേരളം പാസാക്കിയ പ്രമേയം നിയമസഭയുടെ അന്തസ് കെടുത്തുകയാണ് ചെയ്യുന്നത്. ജനങ്ങള്‍ ആഗ്രഹിക്കുന്ന വികസനത്തിനാണ് ബിജെപി നിലകൊള്ളുന്നതെന്നും അബ്ദുള്ളക്കുട്ടി ആരോപിച്ചു.
ലക്ഷദ്വീപിന്റെ പാരമ്ബര്യവും പ്രകൃതിയും സംസ്കാരവും സംരക്ഷിച്ചുകൊണ്ടാണ് കേന്ദ്രസര്‍ക്കാര്‍ ദ്വീപിനെ ലോകത്തെ ഏറ്റവും വലിയ ടൂറിസ്റ്റ് കേന്ദ്രമാക്കുന്നത്. ലക്ഷദ്വീപിലെ ഭൂമി കടലാക്രമണത്താല്‍ ചുരുങ്ങുകയാണ്. അതിനാല്‍ ആളുകളുടെ എണ്ണം നിയന്ത്രിക്കേണ്ടതുണ്ട്. ജനസംഖ്യാ നിയന്ത്രണം അധുനിക കാലത്തിന്റെ രാഷ്ട്രീയമാണെന്നെന്നും അബ്ദുള്ളക്കുട്ടി പറഞ്ഞു. 5000 കോടി രൂപയുടെ വികസന പ്രവര്‍ത്തനങ്ങളാണ് കേന്ദ്രം ലക്ഷദ്വീപില്‍ നടപ്പാക്കുന്നത്. ഇവിടുത്തെ യാത്രാ പ്രശ്നവും കുടിവെള്ള പ്രശ്നവും പരിഹരിച്ചു. ഇനി ദ്വീപ് വാസികള്‍ക്ക് വേണ്ടത് ഡിജിറ്റല്‍ സൗകര്യങ്ങളാണെന്നും അബ്ദുള്ളക്കുട്ടി പറഞ്ഞു.
.