കൊല്ലം: വിലാപ യാത്രയ്ക്ക് 25 ആംബുലന്‍സുകള്‍ ഒന്നിച്ച്‌ നിരത്തിലിറക്കിയ സംഭവത്തില്‍ പൊലീസ് കേസെടുത്തു. ഒരുമിച്ച്‌ സൈറണ്‍ മുഴക്കി വിലാപ യാത്ര നടത്തിയതിനാണ് കേസെടുത്തത്.
വാഹനാപകടത്തില്‍ മരിച്ച കൊട്ടാരക്കര സ്വദേശിയായ ആംബുലന്‍സ് ഡ്രൈവറുടെ മൃതദേഹവുമായാണ് ഇരുപത്തിയഞ്ചോളം ആംബുലന്‍സുകള്‍ റോഡിലൂടെ സൈറണ്‍ മുഴക്കി വിലാപ യാത്ര നടത്തിയത്.
വിലാപയാത്രയുടെ ദൃശ്യങ്ങള്‍ പ്രചരിച്ചതിനു പിന്നാലെ കൊട്ടാരക്കര പൊലീസാണ് കേസെടുത്തത്. 13 ആംബുലന്‍സ് ഡ്രൈവര്‍മാര്‍ക്കെതിരെയാണ് കൊട്ടാരക്കര പൊലീസ് കേസെടുത്തിരിക്കുന്നത്.
കോവിഡ് പ്രോട്ടോകോള്‍ ലംഘിച്ചതിനാണ് കേസ്. ഗതാഗത നിയമലംഘനത്തിന് ആംബുലന്‍സുകള്‍ക്കെതിരെ നടപടി ഉണ്ടാകുമെന്ന് മോട്ടോര്‍ വാഹന വകുപ്പും വ്യക്തമാക്കിയിട്ടുണ്ട്.
കൊട്ടാരക്കര സ്വദേശിയും ആംബുലന്‍സ് ഡ്രൈവറുമായ ഉണ്ണിക്കുട്ടന്‍ ഉള്‍പ്പെടെ നാല് പേര്‍ കഴിഞ്ഞ ദിവസം കരീലക്കുളങ്ങരയിലുണ്ടായ അപകടത്തില്‍ മരണപ്പെട്ടിരുന്നു.
ഉണ്ണിക്കുട്ടന്‍്റെ മൃതദേഹം കൊട്ടാരക്കരയിലേക്ക് കൊണ്ടു വരുമ്പോഴാണ് കൂട്ടത്തോടെ സൈറണ്‍ മുഴക്കി ആംബുലന്‍സുകള്‍ അകമ്ബടി പോയത്.
രോഗികള്‍ ഉള്ളപ്പോഴോ അത്യാവശ്യഘട്ടങ്ങളില്‍ സഞ്ചരിക്കുമ്പോഴോ മാത്രമേ ആംബുലന്‍സുകള്‍ സൈറണ്‍ മുഴക്കാന്‍ പാടുള്ളു വെന്നാണ് നിയമം. ഈ നിയമം ലംഘിച്ചുകൊണ്ടാണ് ആംബുലന്‍സുകള്‍ നിരത്തിലിറങ്ങിയത്. വിലാപയാത്രയില്‍ പങ്കെടുത്തവര്‍ കോവിഡ് പ്രോട്ടോക്കോള്‍ പാലിച്ചില്ലെന്നും പൊലീസ് വ്യക്തമാക്കുന്നു.