രാജ്യത്ത് കൊവിഡ്-19 കേസുകൾ വർധിക്കുന്ന സാഹചര്യം കണക്കിലെടുത്താണ് സിബിഎസ്ഇ പരീക്ഷകളുടെ കാര്യത്തിൽ തീരുമാനമുണ്ടായത്. പ്രധാനമന്ത്രി നരേന്ദ്രമോദിയുടെ അധ്യക്ഷതയില്‍ ചേര്‍ന്ന യോഗത്തിലാണ് തീരുമാനം സ്വീകരിച്ചത്
ന്യൂഡൽഹി: രാജ്യത്ത് കൊവിഡ്-19 കേസുകൾ വർധിച്ചതോടെ സിബിഎസ്ഇ പന്ത്രണ്ടാം ക്ലാസ് പരീക്ഷ മാറ്റിവച്ചു. പത്താം ക്ലാസ് പരീക്ഷ റദ്ദാക്കിയതായും വിദ്യാഭ്യാസ മന്ത്രാലയം അറിയിച്ചു. മേയ് മാസത്തിൽ നടത്താനിരുന്ന പത്താം ക്ലാസ് പരീക്ഷയാണ് റദ്ദാക്കിയത്. പന്ത്രണ്ടാം ക്ലാസ് പരീക്ഷ സംബന്ധിച്ച കാര്യത്തിൽ ജൂൺ ഒന്നിന് ശേഷം തീരുമാനമെടുക്കുമെന്നും പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ ചേര്‍ന്ന യോഗത്തിൽ തീരുമാനമായി.
10, 12 ക്ലാസുകളിലെ ബോർഡ് പരീക്ഷ മേയ് നാല് മുതൽ നടത്താനാണ് സിബിഎസ്ഇ തീരുമാനിച്ചിരുന്നത്. എന്നാൽ കൊവിഡ് കേസികൾ രാജ്യത്ത് വർധിച്ചതോടെ പരീക്ഷകൾ നടത്തുന്നതിനെതിരെ വ്യാപകമായ പരാതി ഉയർന്നു. വിദ്യാർഥികളുടെ മാതാപിതാക്കളും ചില സംസ്ഥാനങ്ങളും ശക്തമായ എതിർപ്പ് അറിയിക്കുകയും ചെയ്‌തു. ഇതോടെയാണ് പ്രധാനമന്ത്രി വിദ്യാഭ്യാസ മന്ത്രി രമേശ് പൊക്രിയാൽ മറ്റ് ഉദ്യോഗസ്ഥർ എന്നിവരുമായി ചർച്ച നടത്തിയത്.
Read more at: https://www.manoramanews.com/news/breaking-news/2021/04/14/cbse-class-12-board-exams-postponed-class-10-exams-cancelled-14.html