കൽപകഞ്ചേരി : ഒൻപതാം ക്ലാസ് വിദ്യാർഥിനിയെ മയക്കുമരുന്ന് നൽകി പീഡിപ്പിച്ച കേസിലെ മുഖ്യപ്രതികൾ പിടിയിൽ. വളവന്നൂർ പൂന്തോട്ടപ്പടി സ്വദേശികളായ ആറ്റുപുറത്ത് മുഹമ്മദ് ഇഖ്ബാൽ (27), പരപ്പിൽ മുഹമ്മദ് ആഷിക് (28) എന്നിവരെയാണ് കൽപകഞ്ചേരി സി ഐ എം ബി റിയാസ് രാജയും സംഘവും അറസ്റ്റ് ചെയ്തത്. കോഴിക്കോട് വിമാനത്താവളത്തിൽ വെച്ചായിരുന്നു അറസ്റ്റ് ചെയ്തത്.
സംഭവത്തിന് ശേഷം ബംഗളൂരുവിലേക്കും ചെന്നൈയിലേക്കും അവിടെനിന്ന് ദുബൈയിലേക്കും കടന്ന ഇവരെ മലയാളി കൂട്ടായ്മകളുടെയും സി ഐ ഡി ഉദ്യോഗസ്ഥരുടെയും സഹായത്തോടെ പൊലീസ് കണ്ടെത്തി തന്ത്രപരമായി നാട്ടിലേക്ക് എത്തിക്കുകയായിരുന്നു. തുടർന്ന് വിമാനത്താവളത്തിൽ നിന്ന് പ്രതികളെ പിടികൂടുകയുമായിരുന്നു. ഇതോടെ കേസിൽ എട്ട് പേർ അറസ്റ്റിലായി.
അന്വേഷണ സംഘത്തിൽ എസ് ഐ മണികണ്ഠൻ, എ എസ് ഐ സി രവി, സീനിയർ പൊലീസ് ഓഫിസർ പി സജുകുമാർ, പി ഷാജു, സി പി ഒ ശൈലേഷ്, ഡബ്ലിയു സി പി ഒ എം എ രജിത, നീന, സി പി ഒമാരായ സോജി, ജോൺസൺ എന്നിവരുമുണ്ടായിരുന്നു. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.