തിരുവല്ല: തിരുവല്ല സ്വദേശിയായ യുവാവിനെ കിളിമാനൂര്‍ ഇരട്ടച്ചിറയിലെ ബസ് കാത്തിരിപ്പ് കേന്ദ്രത്തില്‍ മരിച്ചനിലയില്‍ കണ്ടെത്തി. കുറ്റൂര്‍ പടിഞ്ഞാറ്റോതറ ഒട്ടത്തില്‍ വീട്ടില്‍ സുധാകരന്റെ മകന്‍ പി.എസ്. പ്രശാന്താണ് (27) മരിച്ചത്. ഓതറ പോബ്സണ്‍ ഇന്‍ഡസ്ട്രീസിലെ ജീവനക്കാരനാണ്.
ചൊവ്വാഴ്ച പുലര്‍ച്ച ആറോടെയാണ് കമിഴ്ന്ന് കിടക്കുന്ന നിലയില്‍ മൃതദേഹം കണ്ടത്. സ്വന്തം ബൈക്കും സമീപത്തുണ്ടായിരുന്നു. വാഹന രജിസ്‌ട്രേഷന്‍ വിവരങ്ങള്‍ കണ്ടെത്തിയാണ് ആളെ തിരിച്ചറിഞ്ഞത്. കഴിഞ്ഞയാഴ്ച പ്രശാന്തിന്റെ മൊബൈല്‍ ഫോണ്‍ നഷ്ടപ്പെട്ടിരുന്നു. മൊബൈല്‍ ലഭിച്ചതായി അറിയിച്ച്‌ കിളിമാനൂരില്‍നിന്ന് ഞായറാഴ്ച ഫോണ്‍കാള്‍ വന്നതിനെത്തുടര്‍ന്ന് വാങ്ങാന്‍ ഞായറാഴ്ച ഉച്ചക്ക് 12.30ഓടെ ബൈക്കില്‍ കിളിമാനൂര്‍ക്ക് പോയതായി ബന്ധുക്കള്‍ പറഞ്ഞു.
കിളിമാനൂര്‍ പൊലീസ് നടപടി പൂര്‍ത്തിയാക്കിയശേഷം മൃതദേഹം മോര്‍ച്ചറിയിലേക്ക് മാറ്റി. സംസ്കാരം പിന്നീട്. അവിവാഹിതനാണ്. മാതാവ്: സാവിത്രി. സഹോദരി: നമിത.