ശ്രീനഗറില്‍ ഏറ്റുമുട്ടലില്‍ മൂന്ന് ഭീകരര്‍ കൊല്ലപ്പെട്ടതായി പൊലീസ്. ചൊവ്വാഴ്ച്ച വൈകിട്ടോടെ ഭീകരര്‍ സുരക്ഷാ സേനക്ക് നേരെ വെടിയുതിര്‍ക്കുകയായിരുന്നു എന്നാണ് പോലീസ് പറയുന്നത്. തുടര്‍ന്ന് രാത്രി മുഴുവന്‍ ഇരുകൂട്ടരും വെടിവെപ്പ് തുടര്‍ന്നതായും പോലീസ് കൂട്ടിച്ചേര്‍ത്തു. എന്നാല്‍ പോലീസ് റെക്കോര്‍ഡില്‍ തീവ്രവാദികളായി ലിസ്റ്റ് ചെയ്യപ്പെടാത്തവരാണ് കൊല്ലപ്പെട്ടവര്‍. കൊല്ലപ്പെട്ടവര്‍ തങ്ങളുടെ ലിസ്റ്റില്‍ ഇല്ലാത്തവരാണ് എങ്കിലും പരോക്ഷമായി തീവ്രവാദികളുമായി അടുത്ത ബന്ധമുള്ളവരാണെന്നാണ് പോലീസ് പ്രസ്താവനയില്‍ പറയുന്നത്.
അതേസമയം കൊല്ലപ്പെട്ടവര്‍ ഭീകരവാദികളല്ലെന്നും നിരപരാധികളാണെന്നും വ്യക്തമാക്കി ശ്രീനഗറില്‍ കുടുംബം പ്രതിഷേധം നടത്തി. കൊല്ലപ്പെട്ട മൂന്നുപേരും നിരപരാധികളാണെന്നും ചൊവ്വാഴ്ച കശ്മീര്‍ സര്‍വകലാശാലയില്‍ അപേക്ഷ സമര്‍പ്പിക്കാന്‍ പോയ വിദ്യാര്‍ഥികളെയാണ് കൊലപ്പെടുത്തിയതെന്നും കുടുംബം പറഞ്ഞു.കൊല്ലപ്പെട്ടവരില്‍ ഒരാള്‍ 11ാം ക്ലാസ് വിദ്യാര്‍ഥിയായിരുന്നുവെന്നും പറയുന്നു.