തിരുവനന്തപുരം : നാളെ മുതല്‍ മോട്ടോര്‍ വാഹനവകുപ്പിന്റെ സേവനങ്ങള്‍ പൂര്‍ണമായും ഓണ്‍ലൈനാകുമെന്ന് ഗതാഗതമന്ത്രി എ കെ ശശീന്ദ്രന്‍. ഡ്രൈവിംഗ് ടെസ്റ്റ് ഒഴികെ ലൈസന്‍സ് സംബന്ധിച്ച സേവനങ്ങള്‍ ഓണ്‍ലൈന്‍ വഴി ലഭ്യമാക്കും. മോട്ടോര്‍ വാഹന വകുപ്പിന് കീഴിലുള്ള എല്ലാ ഓഫിസുകളും ഇ-ഓഫിസുകളായി മാറുമെന്നും സംവിധാനം പ്രവാസികള്‍ക്ക് കൂടുതല്‍ സഹായകരമാകുമെന്നും മന്ത്രി പറഞ്ഞു.
മോട്ടോര്‍ വാഹനവകുപ്പില്‍ നൂതന പരിഷ്‌ക്കാരങ്ങള്‍ നടപ്പിലാക്കുക വഴി ആര്‍ടിഒ ഓഫിസുകളില്‍ ആള്‍ത്തിരക്ക് ഒഴിവാക്കുകയാണ് ലക്ഷ്യം. ഡിപ്പാര്‍ട്ട്‌മെന്റിന് കീഴിലെ ഭൂരിഭാഗം സേവനങ്ങളും ഓണ്‍ലൈനായി ലഭ്യമാക്കും.
വാഹന നികുതി അടയ്ക്കാനും പെര്‍മിറ്റ് എടുക്കാനും ഓണ്‍ലൈന്‍ സംവിധാനമായി. ചെക്ക് പോസ്റ്റുകളുടെ പ്രവര്‍ത്തനം പൂര്‍ണമായും ഓണ്‍ലൈന്‍ ആക്കും. ഇന്റര്‍നാഷണല്‍ ഡ്രൈവിംഗ് പെര്‍മിറ്റിന് നാട്ടിലെത്താതെ തന്നെ പ്രവാസികള്‍ക്ക് ഡോക്യൂമെന്റുകള്‍ അപ്ലോഡ് ചെയ്ത് ഓണ്‍ലൈനില്‍ ഫീസ് അടക്കാം. പ്രവാസികള്‍ക്ക് ലൈസന്‍സ് പുതുക്കാനും ഓണ്‍ലൈന്‍ സേവനമുപയോഗിക്കാമെന്നും മന്ത്രി എകെ ശശീന്ദ്രന്‍ പറഞ്ഞു.
എല്ലാ പുക പരിശോധന കേന്ദ്രങ്ങളിലും ഓണ്‍ലൈന്‍ സംവിധാനം നിര്‍ബന്ധമാക്കും. കൊവിഡ് പശ്ചാത്തലത്തില്‍ വര്‍ധിപ്പിച്ച ബസ് ചാര്‍ജ് പിന്‍വലിക്കുന്ന കാര്യം പരിശോധിക്കും. ഫാസ്റ്റാഗ് നിര്‍ബന്ധമാക്കിയാല്‍ കെഎസ്‌ആര്‍ടിസിക്ക് ഭീമമായ തുക ബാധ്യത വരുമെന്നും ഇത്തില്‍ നിന്ന് കെഎസ്‌ആര്‍ടിസിയെ ഒഴിവാക്കണമെന്നാവശ്യപ്പെട്ട് മുഖ്യമന്ത്രി കേന്ദ്രത്തിന് കത്തയക്കുമെന്നും മന്ത്രി പറഞ്ഞു.