സിഡ്നി: ആസ്ട്രേലിയക്കെതിരായ മൂന്നാം ട്വന്‍റി20 ക്രിക്കറ്റ് മത്സരത്തില്‍ ഇന്ത്യക്ക് 187 റണ്‍സ് വിജയലക്ഷ്യം. അര്‍ധശതകം കുറിച്ച മാത്യൂ വെയ്ഡും (80) െഗ്ലന്‍ മാക്സ്വെലും (54) തിളങ്ങിയതിനൊപ്പം ഇന്ത്യയുടെ ഫീല്‍ഡിങ് പിഴവുകളും തുണക്കെത്തിയപ്പോള്‍ നിശ്ചിത 20 ഓവറില്‍ ആതിഥേയര്‍ അഞ്ചു വിക്കറ്റ് നഷ്ടത്തിലാണ് 186 റണ്‍സടിച്ചത്.
ഓപണറായിറങ്ങിയ വെയ്ഡ് 53 പന്തില്‍ ഏഴു ഫോറും രണ്ടു സിക്സും പറത്തിയപ്പോള്‍ മാക്സ്വെല്‍ 36 പന്തു നേരിട്ട് മൂന്നുവീതം ഫോറും സിക്സുമടിച്ചു. സ്റ്റീവ് സ്മിത്ത് 23പന്തില്‍ 24 റണ്‍സ് നേടി. ക്യാപ്റ്റന്‍ ആരോണ്‍ ഫിഞ്ച് (പൂജ്യം), ഡാര്‍സി ഷോര്‍ട്ട് (ഏഴ്), എന്നിവരാണ് പുറത്തായ മറ്റു ബാറ്റ്സ്മാന്മാര്‍. 34 റണ്‍സ് വഴങ്ങി രണ്ടു വിക്കറ്റെടുത്ത വാഷിങ്ടണ്‍ സുന്ദറാണ് ഇന്ത്യന്‍ ബൗളിങ്ങില്‍ തിളങ്ങിയത്. നടരാജനും ശാര്‍ദുല്‍ താക്കൂറും ഓരോ വിക്കറ്റ് വീഴ്ത്തി.