ചെന്നൈ: തീരം തൊട്ടതോടെ നിവാര് ചുഴലിക്കാറ്റിന്റെ തീവ്രത കുറഞ്ഞു. നിവര് ആശങ്ക ഒഴിയുന്നതായി കാലാവസ്ഥാ നിരീക്ഷണ കേന്ദ്രം അറിയിച്ചു. വരുന്ന മണിക്കൂറുകളില് തീവ്രത കുറഞ്ഞ് നിവാര് കൊടുങ്കാറ്റായി മാറും. മണിക്കൂറില് 135 കിമി വേഗം പ്രവചിക്കപ്പെട്ടിരുന്ന നിവറിന്റെ വേഗം 65-75 കിമീറററായി കുറയും. ഇതോടെ 12 മണിക്കൂര് അടച്ചിട്ട ചെന്നൈ വിമാനത്താവളത്തിന്റെ പ്രവര്ത്തനം പുനഃരാരംഭിച്ചിട്ടുണ്ട്. ചെന്നൈയില് അടച്ചിട്ട റോഡുകള് തുറന്നു.
തമിഴ്നാട് കടലൂരില് നിന്ന് തെക്കുകിഴക്കായി കോട്ടക്കുപ്പം ഗ്രാമത്തിലാണ് ചുഴലിക്കാറ്റ് ആദ്യമായി കരതൊട്ടത്. നിവാര് ചുഴലിക്കാറ്റില് തമിഴ്നാട്ടിലും പുതുച്ചേരിയിലും വ്യാപക നാശനഷ്ടമാണുണ്ടായത്. ചെന്നൈയില് പല ഇടങ്ങളിലും വൈദ്യുതി വിതരണം തടസപ്പെട്ടു. കടലൂരിലും വ്യാപക നാശനഷ്ടമുണ്ടായി. വേദാരണ്യത്ത് വൈദ്യുതി പോസ്റ്റ് വീണ് കുട്ടി മരിച്ചു. വില്ലുപുരത്ത് വീടുതകര്ന്ന് ഒരാള് മരിച്ചു.
ചെന്നൈ, ചെങ്കല്പ്പേട്ട്, കാഞ്ചീപുരം പുതുച്ചേരി, കടലൂര്, വിഴുപുരം തുടങ്ങിയിടങ്ങളില് കനത്ത നാശനഷ്ടമുണ്ടായി. പുതുച്ചേരിയില് മുഖ്യമന്ത്രി വി. നാരായണ സ്വാമിയുടെ വീട് അടക്കം നിരവധി ആളുകളുടെ വീടുകളില് വെള്ളം കയറി.
നിവാര് വ്യാഴാഴ്ച പുലര്ച്ചെയോടെയാണ് പൂര്ണമായും കരയില് കടന്നത്. പുതുച്ചേരിക്കും മാരക്കാനത്തിനും ഇടയ്ക്കുള്ള തീരത്താണ് ചുഴലിക്കാറ്റ് പ്രവേശിച്ചത്. തീരത്ത് എത്തിയപ്പോഴേക്ക് തീവ്രത കുറഞ്ഞിട്ടുണ്ട്.