കൊച്ചി: പാലാരിവട്ടം അഴിമതിക്കേസില് അറസ്റ്റിലായ മുന് മന്ത്രി വി.കെ.ഇബ്രാഹിംകുഞ്ഞിന് ജാമ്യമില്ല. ഇബ്രാഹിംകുഞ്ഞിനെ കസ്റ്റഡിയില് വേണമെന്ന ആവശ്യവും കോടതി തള്ളി. മൂവാറ്റുപുഴ വിജിലന്സ് കോടതിയുടേതാണ് നടപടി.
തിങ്കളാഴ്ച ആശുപത്രിയില് അഞ്ചുമണിക്കൂര് ചോദ്യം ചെയ്യാന് വിജിലന്സിന് അനുമതി നല്കിയിട്ടുണ്ട്. മാനസികമായോ ശാരീരികമായോ ബുദ്ധിമുട്ടിക്കരുതെന്ന് കോടതി നിര്ദേശിച്ചു. ശാരീരിക ബുദ്ധിമുട്ടുകളെ തുടര്ന്ന് ഇബ്രാഹിംകുഞ്ഞ് ഇപ്പോള് ആശുപത്രിയില് ചികിത്സയിലാണ്.
അര്ബുദബാധിതനായ ഇബ്രാഹിംകുഞ്ഞിന് നിലവില് സ്വകാര്യ ആശുപത്രിയില് ലഭിക്കുന്ന ചികിത്സയ്ക്ക് തുല്യമായ ചികിത്സ നല്കാന് എറണാകുളം ജില്ലയിലെ സര്ക്കാര് ആശുപത്രികളില് സൗകര്യമില്ലെന്ന് ജില്ലാ മെഡിക്കല് ഓഫിസര് കോടതിയെ അറിയിച്ചിരുന്നു.
ആശുപത്രി മാറ്റണമെന്ന അപേക്ഷ പിന്വലിച്ച വിജിലന്സ് സ്വകാര്യ ആശുപത്രിയില് തന്നെ ഇബ്രാഹിംകുഞ്ഞിനെ ചോദ്യം ചെയ്യാന് അനുവദിക്കണമെന്ന് കോടതിയോട് ആവശ്യപ്പെട്ടിരുന്നു. കസ്റ്റഡി അപേക്ഷ തള്ളിയതോടെ ആശുപത്രിയില് ചോദ്യം ചെയ്യാനുള്ള അനുമതി ലഭിക്കുകയായിരുന്നു.
പാലാരിവട്ടം അഴിമതിക്കേസില് അഞ്ചാം പ്രതിയാണ് ഇബ്രാഹിംകുഞ്ഞ്. ഇബ്രാഹിംകുഞ്ഞിനെ 14 ദിവസത്തേക്ക് റിമാന്ഡ് ചെയ്തിരുന്നു. നവംബര് 18 നാണ് ഇബ്രാഹിംകുഞ്ഞിനെ അറസ്റ്റ് ചെയ്തത്. കൊച്ചിയിലെ ലേക്ക് ഷോര് ആശുപത്രിയില് എത്തിയാണ് ചികിത്സയില് കഴിയുന്ന ഇബ്രാഹിംകുഞ്ഞിന്റെ അറസ്റ്റ് വിജിലന്സ് രേഖപ്പെടുത്തിയത്.