മലങ്കര സഭാ തര്ക്കം പരിഹരിക്കാനുള്ള ചര്ച്ചകളില് നിന്ന് ഓര്ത്തഡോക്സ് സഭ പിന്മാറിയതോടെ സര്ക്കാര് പ്രതിരോധത്തിലായി. സര്ക്കാര് കോടതിയില് സമര്പ്പിച്ച സത്യവാങ്മൂലം വാസ്തവ വിരുദ്ധമാണെന്ന് ഓര്ത്തഡോക്സ് സഭ ഹൈക്കോടതിയെ ബോധിപ്പിക്കും. മലങ്കര സഭ തര്ക്കത്തില് സമവായ ശ്രമങ്ങള് തുടരണമെന്ന് യാക്കോബായ സഭ നേതൃത്വം അറിയിച്ചു.
ഓര്ത്തഡോക്സ്-യാക്കോബായ വിഭാഗങ്ങള് തമ്മില് നടക്കുന്ന ചര്ച്ച ചൂണ്ടിക്കാട്ടി കോതമംഗലം പള്ളി ഏറ്റെടുക്കാനുള്ള വിധി നടപ്പിലാക്കാന് സമയം നീട്ടി വാങ്ങാനായിരുന്നു സര്ക്കാരിന്റെ നീക്കം. ഇതിന്റെ ഭാഗമായാണ് ഇരുസഭകളുമായി നടക്കുന്ന ചര്ച്ചകളില് തീരുമാനമാകും വരെ കോടതി ഉത്തരവ് നടപ്പാക്കേണ്ടെന്ന ധാരണയുണ്ടെന്നും സര്ക്കാര് കോടതില് വ്യക്തമാക്കി. എന്നാല് സര്ക്കാര് നിലപാടിനെതിരെ രംഗത്ത് വന്ന ഓര്ത്തഡോക്സ് സഭ ചര്ച്ചകളില് നിന്ന് പിന്മാറുകയാണെന്ന് സ്വയം വെളിപ്പെടുത്തി.