പത്തനംതിട്ട : ബി ജെ പി മുന്‍ സംസ്ഥാന അദ്ധ്യക്ഷനും മിസോറം മുന്‍ ഗവര്‍ണറുമായിരുന്ന കുമ്മനം രാജശേഖരനെതിരെ ആറന്മുള സ്വദേശി നല്‍കിയ പരാതി പിന്‍വലിച്ചു.
കുമ്മനമടക്കം ഒന്‍പതു പേരെ പ്രതികളാക്കി ആറന്മുള പോലീസ് കേസെടുത്തിരുന്നു. പാലക്കാട് ഭാരത് ബയോ പൊളിമര്‍ കമ്പനിയിൽ പങ്കാളി ആക്കാമെന്ന് വാഗ്ദാനം ചെയ്ത് ആറന്മുള സ്വദേശിയും കുമ്മനത്തിന്റെ മുന്‍ പി.എയുമായ പ്രവീണ്‍കുമാര്‍ 28.75 ലക്ഷം രൂപ തട്ടിയെന്നാണ് പരാതി.
ആറന്മുള പുത്തേഴത്ത് ഇല്ലം സി ആര്‍ ഹരികൃഷ്ണനാണ് പരാതി നല്‍കിയത്. എന്നാല്‍ കുമ്മനത്തിനെ പ്രതിയാക്കി എന്ന റിപ്പോര്‍ട്ട് പുറത്ത് വന്നതോടെ പാര്‍ട്ടി നേതൃത്വം പരാതിക്കാരനുമായി സംസാരിച്ചുവെന്ന് റിപ്പോര്‍ട്ടുകളുണ്ടായിരുന്നു.
ഇതിനെ തുടര്‍ന്ന് കേസ് ഒത്തുതീര്‍പ്പിലേക്കെത്തുകയായിരുന്നു. നല്‍കിയ മുഴുവന്‍ പണവും പരാതിക്കാരന് തിരികെ ലഭിച്ചതിനെ തുടര്‍ന്നാണ് പരാതി പിന്‍വലിച്ചതെന്നാണ് ലഭിക്കുന്ന സൂചന.
സ്വദേശി തുണി ഉത്പന്നങ്ങള്‍ നിര്‍മ്മിച്ച്‌ വിതരണം ചെയ്യുന്ന പാലക്കാട്ടെ പദ്ധതിക്കാണ് പ്രവീണ്‍ പണം വാങ്ങിയതെന്ന് പരാതിയില്‍ പറയുന്നു.