തിരുവനന്തപുരം : സ്ത്രീകള്‍ക്കും കുട്ടികള്‍ക്കുമെതിരായി നടക്കുന്ന ബലാല്‍സംഗ-പോക്സോ കേസുകളുടെ വിചാരണകള്‍ വേഗത്തിലാക്കുവാന്‍ സംസ്ഥാനത്ത് സജ്ജമാക്കുന്ന ഫാസ്റ്റ്ട്രാക്ക് സ്പെഷ്യല്‍ കോടതികളില്‍ അഞ്ചെണ്ണം ഇന്ന് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. നെയ്യാറ്റിന്‍ക്കര, ആലുവ, തിരൂര്‍, മഞ്ചേരി, ഹോസ്ദുര്‍ഗ് എന്നിവിടങ്ങളിലാണ് പുതിയ കോടതികള്‍.
പ്രത്യേക കോടതികളുടെ അഭാവത്തില്‍ പോക്സോ കേസുകള്‍ കെട്ടിക്കിടക്കുകയും വിധി നീണ്ടു പോവുകയും ചെയ്യുന്നത് ഒഴിവാക്കാനാണ് ഫാസ്റ്റ്ട്രാക്ക് സ്പെഷ്യല്‍ കോടതികള്‍ സര്‍ക്കാര്‍ സ്ഥാപിക്കുന്നത്. കേന്ദ്ര സര്‍ക്കാരിന്റെ ‘സ്ത്രീ സുരക്ഷാ മിഷന്‍’ പദ്ധതിയനുസരിച്ചാണ് കോടതികള്‍ സ്ഥാപിക്കുന്നത്. വൈകിട്ട് 3നാണ് ഉദ്ഘാടനം .
സ്പെഷ്യല്‍ പബ്ലിക് പ്രോസിക്യൂട്ടര്‍മാരായി അജിത് തങ്കയ്യ (നെയ്യാറ്റിന്‍ക്കര) , യമുന പി ജി(ആലുവ), എ സോമസുന്ദരന്‍(മഞ്ചേരി), മജീദ അബ്ദുള്‍ മജീദ്(തിരൂര്‍), ബിന്ദു പി (ഹോസ്ദുര്‍ഗ്) എന്നിവരെ സര്‍ക്കാര്‍ നിയമിച്ചു
14 ജില്ലകളിലായി 28 ഫാസ്റ്റ്ട്രാക്ക് കോടതികള്‍ സ്ഥാപിക്കാനാണ് ഹൈക്കോടതിയോട് സംസ്ഥാന സര്‍ക്കാര്‍ നിര്‍ദ്ദേശിച്ചത്. ആവശ്യമായ ഫണ്ടും അനുമതിയും സര്‍ക്കാര്‍ ലഭ്യമാക്കുകയും കോടതികള്‍ സ്ഥാപിക്കേണ്ട സ്ഥലങ്ങള്‍ ഹൈക്കോടതി കണ്ടെത്തുകയും ചെയ്തു.
ഇവയില്‍ 17 കോടതികളുടെ പ്രവര്‍ത്തനം ഈ വര്‍ഷം ജൂലൈ 1 മുതല്‍ ആരംഭിച്ചു . ശേഷിച്ച 11 കോടതികളില്‍ അഞ്ചെണ്ണമാണ് ഇന്ന് മുതല്‍ പ്രവര്‍ത്തനമാരംഭിക്കുന്നത്.