രാജമല പെട്ടിമുടി ദുരന്തത്തില്‍ ഇന്ന് മൂന്ന് പേരുടെ മൃതദേഹം കൂടി കണ്ടെത്തി.ആരെയും തിരിച്ചറിഞ്ഞിട്ടില്ല. ഇതോടെ മരിച്ചവരുടെ എണ്ണം 55 ആയി. പല ടീമുകളായി തിരിഞ്ഞ് പെട്ടിമുടിയാറിന്റെ വിവിധ ഭാഗങ്ങളില്‍ തെരച്ചില്‍ തുടരുകയാണ്.
പുഴ കേന്ദ്രീകരിച്ചു നടത്തിയ തിരച്ചിലിലാണ് ഇന്ന് മൃതദേഹങ്ങള്‍ കണ്ടെടുത്തത്. കഴിഞ്ഞ ദിവസം കണ്ടെടുത്ത് ആറു മൃതദേഹങ്ങളും പുഴയില്‍ നിന്നു തന്നെയാണ് കണ്ടെത്തിയത്.
ആറു ദിവസമായി തുടരുന്ന തിരച്ചില്‍ വൈകുംതോറും മണ്ണിലും, മാലവെള്ളപ്പാച്ചിലിലും അകപ്പെട്ട മനുഷ്യരെ കണ്ടെത്താന്‍ ഉള്ള സാധ്യതകള്‍ മങ്ങുകയാണ്.
മേഖലയില്‍ നിലനില്‍ക്കുന്ന പ്രതികൂല കാലാവസ്ഥയും പുഴയിലെ ശക്തമായ ഒഴുക്കില്‍പ്പെട്ട് മൃതദേഹങ്ങള്‍ ദൂരെയെത്തിയിരിക്കാനുള്ള സാധ്യതയും ഉള്ളതിനാല്‍ പുതിയ മൃതദേഹങ്ങള്‍ കണ്ടെത്താനുള്ള സാധ്യത മങ്ങുകയാണ്.