ഇടുക്കി : കനത്തമഴയെ തുടര്‍ന്നുള്ള ശക്തമായ നീരൊഴുക്കില്‍ മുല്ലപ്പെരിയാര്‍ ഡാമില്‍ ജലനിരപ്പുയരുന്നതില്‍ ആശങ്കയുണ്ടെന്ന് മന്ത്രി എം എം മണി. ജലനിരപ്പുയരുന്നതിലെ ആശങ്ക കേരളം തമിഴ്നാടിനെ അറിയിച്ചിട്ടുണ്ട്. ഡാം തുറക്കുന്നതിന്‍റെ നിയന്ത്രണം തമിഴ്നാടിനാണ് . സംസ്ഥാനത്ത് ആവശ്യമായ മുന്നൊരുക്കം നടത്തിയിട്ടുണ്ടെന്നും മന്ത്രി എം എം മണി അറിയിച്ചു. മുല്ലപ്പെരിയാറില്‍ ജലനിരപ്പ് 133.85 അടിയിലേക്ക് എത്തിയിരുന്നു. 142 അടിയാണ് അണക്കെട്ടിന്റെ പരമാവധി സംഭരണശേഷി. ജലനിരപ്പ് 132 അടിയിലേക്കെത്തിയതോടെ ജാഗ്രാത നിര്‍ദേശം നൽകി. ജലനിരപ്പ് ഉയരുന്ന സാഹചര്യത്തില്‍, ഡാം തുറക്കാന്‍ സാധ്യത ഉള്ളതിനാല്‍ തീരദേശവാസികള്‍ ജാഗ്രത പാലിക്കണമെന്ന് പീരുമേട് എം.എല്‍.എ. ഇ. എസ്. ബിജിമോള്‍ അറിയിച്ചു.
പെരിയാറിന്റെ തീരത്തുള്ളവര്‍ ജാഗ്രത പുലര്‍ത്തണമെന്നും പ്രായമായവരും കുട്ടികളും ഉള്‍പ്പെടെയുള്ള ആളുകള്‍ ബന്ധുവീടുകളിലേക്കോ ക്യാമ്പുകളിലേക്കോ മാറണമെന്നും അറിയിച്ചിട്ടുണ്ട്.