കരിപ്പൂര് വിമാനത്താവളം സുരക്ഷിതമല്ലെന്നും മഴക്കാലത്ത് ലാന്ഡിങ് അനുവദിക്കരുതെന്നും ഒന്പതുവര്ഷം മുന്പ് കേന്ദ്ര വ്യോമയാനമന്ത്രാലയം നിയോഗിച്ച സുരക്ഷാ ഉപദേശക സമിതിയില് അംഗമായ ക്യാപ്റ്റന് മോഹന് രംഗനാഥനാണ് മുന്നറിയിപ്പ് നല്കിയത്. മഴക്കാലത്ത് ടേബിള് ടോപ്പ് റണ്വേയില് വിമാനമിറങ്ങുന്നതിന് പ്രത്യേക മാര്ഗനിര്ദേശങ്ങളൊന്നുമില്ല. 2011 ജൂണ് 17ന് അദ്ദേഹം വ്യോമയാന മന്ത്രാലയ സുരക്ഷാ ഉപദേശക സമിതി ചെയര്മാനും വ്യോമയാന മന്ത്രാലയം സെക്രട്ടറിക്കും ഡിജിസിഎക്കും ഇക്കാര്യങ്ങള് ചൂണ്ടിക്കാട്ടി കത്ത് നല്കിയിരുന്നു. മതിയായ സുരക്ഷാ പ്രദേശം ഇല്ലാത്തതിനാല് റണ്വേ 10ന് അനുമതി നല്കരുത്. അധിക സുരക്ഷാ ഏരിയ 240 മീറ്ററാക്കണം. സുരക്ഷ ഉറപ്പാക്കുന്നവിധത്തില് റണ്വേയുടെ നീളം ക്രമീകരിക്കണമെന്നും അറിയിപ്പ് നല്കിയിരുന്നു.
കരിപ്പൂരിലേത് ടേബിള് ടോപ്പ് റണ്വേയാണെന്നും റണ്വേ അവസാനിക്കുന്നിടത്തെ ബഫര് സോണ് പര്യാപ്തമല്ലെന്ന് ക്യാപ്റ്റന് മോഹന് രംഗനാഥിനെ ഉദ്ധരിച്ച് ടൈംസ് ഓഫ് ഇന്ത്യ റിപ്പോര്ട്ട് ചെയ്യുന്നു. വിമാനം റണ്വേക്കുള്ളില് നിര്ത്താനായില്ലെങ്കില് , അവസാനഭാഗത്ത് മതിയായ സുരക്ഷാ ഏരിയ ഇല്ല. ഐഎല്എസ് ലോക്കലൈസര് ആന്റിന സഥാപിച്ച കോണ്ക്രീറ്റ് ഭാഗം കഴിഞ്ഞാല് ചരിഞ്ഞ ഭൂമിയാണെന്നും മംഗലാപുരത്തെ എയര് ഇന്ത്യ എക്സ്പ്രസ് വിമാനം അപകടത്തില്പ്പെട്ട സംഭവത്തെ തുടര്ന്ന് റണ്വേകളുടെ സുരക്ഷിതത്വം ഉറപ്പാക്കാനുള്ള നടപടികള് എയര്പോര്ട്ട് അതോറിറ്റി സ്വീകരിച്ചിട്ടില്ലെന്നും അദ്ദേഹം ചൂണ്ടിക്കാട്ടുന്നു.