ന്യൂഡല്‍ഹി : റഷ്യയില്‍ നിന്ന് 33 ആധുനിക യുദ്ധവിമാനങ്ങള്‍ വാങ്ങാനുള്ള വ്യോമസേനയുടെ നിര്‍ദേശത്തിന് കേന്ദ്രസര്‍ക്കാര്‍ അനുമതി. 38,900 കോടിരൂപയുടെ പ്രതിരോധ ഇടപാടിനാണ് അനുമതി നല്‍കിയിരിക്കുന്നത്. അതിര്‍ത്തിയില്‍ സംഘര്‍ഷം തുടരുന്ന സാഹചര്യത്തിലാണ് പ്രതിരോധന്ത്രാലയത്തിന്റെ അനുമതി.
12 സുഖോയ് 30 വിമാനങ്ങളും 21 മിഗ് 29 എസ് വിമനങ്ങളും വാങ്ങും. മിഗ് വിമാന ഇടപാടിന് 7,418കോടി രൂപയും, സുഖോയ് ഇടപാട് 10,730 കോടിയുമാണ് ചെലവ് വരിക. വ്യോമസേനയാണ് യുദ്ധവിമാനങ്ങള്‍ വാങ്ങാനുള്ള നിര്‍ദ്ദേശം സമര്‍പ്പിച്ചത്. ഇതിന് മാത്രമായി 18,148 കോടി രൂപ ചെലവ് വരും.
വ്യോമസേനയ്ക്കും നാവിക സേനയ്ക്കുമായി 248 അസ്ട്ര ബിയോണ്ട് വിഷ്വല്‍ റേഞ്ച് എയര്‍ ടൈം എയര്‍ മിസൈലുകള്‍ വാങ്ങാനും മന്ത്രാലയം അനുമതി നല്‍കി. നാവിക സേനയ്ക്ക് ദീര്‍ഘദൂര ക്രൂയിസ് മിസൈലുകള്‍ വികസിപ്പിക്കാനുള്ള നടപടിക്കും പ്രതിരോധമന്ത്രാലയം അനുമതി നല്‍കി. തദ്ദേശീയമായിട്ടായിരിക്കും വികസിപ്പിക്കുക.