പാലക്കാട് : ഒറ്റപ്പാലത്തിനടുത്ത് പനമണ്ണയില്‍ സഹോദരനെ ആക്രമിക്കുന്നതറിഞ്ഞ് ഓടിയെത്തി വെട്ടേറ്റ് ചികിത്സയിലായിരുന്ന യുവാവ് മരിച്ചു. പനമണ്ണ ചക്യാവില്‍ പരേതനായ ഉണ്ണികൃഷ്ണന്റെയും ബേബിയുടെയും മകന്‍ വിനോദാണ് മരിച്ചത്. 32 വയസായിരുന്നു.സംഭവത്തില്‍ വധശ്രമത്തിന് 11 പേര്‍ക്കെതിരെ കേസെടുത്തിരുന്നെങ്കിലും അറസ്റ്റിലായത് രണ്ടുപേര്‍. കഴിഞ്ഞ മേയ് 31 ന് രാത്രി പത്ത് മണിയോടെ വിനോദിന്റെ സഹോദരന്‍ രാമചന്ദ്രന്(29) ബൈക്കില്‍ വരുന്നതിനിടെ പനമണ്ണയില്‍വെച്ച് ഒരു സംഘമാളുകള്‍ ആക്രമിക്കുകയായിരുന്നു.
ഇതറിഞ്ഞാണ് വിനോദ് ഇവിടെയെത്തിയത്. തുടര്‍ന്ന് വിനോദിനും വെട്ടേറ്റു. രാമചന്ദ്രന് മുതുകിലാണ് വെട്ടേറ്റിരുന്നത്. വിനോദിന് തലയിലും കാലിലും ആന്തരികാവയവങ്ങള്‍ക്കും ഗുരുതരമായി മുറിവേറ്റു. ഇരുവരെയും ആദ്യം കണ്ണിയംപുറം സ്വകാര്യാശുപത്രിയില്‍ പ്രവേശിപ്പിച്ചെങ്കിലും പിന്നീട് നില ഗുരുതരമായതിനെ തുടര്‍ന്ന് വിനോദിനെ പെരിന്തല്‍മണ്ണയിലെ സ്വകാര്യശുപത്രിയിലേക്ക് മാറ്റി. ഇവിടെ ചികിത്സയില്‍ കഴിയവെ ചൊവ്വാഴ്ചയാണ് മരണം.
സംഭവത്തില്‍ നേരത്തെ 11 പേര്‍ക്കെതിരെ വധശ്രമത്തിന് കേസെടുക്കുകയും രണ്ടുപേരെ അറസ്റ്റ് ചെയ്യുകയും ചെയ്തിരുന്നു. അമ്പലവട്ടം പനമണ്ണ തറയില്‍ വീട്ടില്‍ മനാഫ്(36), പനമണ്ണ അരഞ്ഞിക്കല്‍ വീട്ടില്‍ അബ്ദുള്‍ റഹ്മാന്‍(34)എന്നിവരെയാണ് പോലീസ് അറസ്റ്റ് ചെയ്തിരുന്നത്. മുന്‍ എസ്ഡിപിഐ ജില്ലാ പ്രസിഡന്റിനെ ആക്രമിച്ച കേസില്‍ പ്രതിയാണ് രാമചന്ദ്രനെന്നും ആ വിരോധമാണ് അക്രമത്തില്‍ കലാശിച്ചതെന്നുമാണ് പോലീസ് പറയുന്നത്.
ആക്രമത്തിന് പിന്നില്‍ എസ്ഡിപിഐ പ്രവര്‍ത്തകരാണെന്ന് വിനോദിന്റെ ബന്ധുക്കളും പോലീസിന് പരാതി നല്‍കിയിരുന്നു. കേസില്‍ പിടികൂടിയ ഇരുവരും നിലവില്‍ റിമാന്‍ഡിലാണ്. ആയുധങ്ങളും പോലീസ് കണ്ടെടുത്തിരുന്നു. കേസിലുള്‍പ്പെട്ട മറ്റുള്ളവര്‍ക്കായി അന്വേഷണം നടക്കുകയാണെന്ന് പോലീസ് അറിയിച്ചു. കാര്‍ വ്യാപാര സ്ഥാപനത്തില്‍ ഡ്രൈവറായിരുന്നു വിനോദ്. ഭാര്യ: ശ്രീമന്യ. മകള്‍: മിത്രലക്ഷ്മി (ഏഴുമാസം).
