ന്യൂഡല്‍ഹി : രാജ്യത്ത് കോവിഡ് ബാധിതരുടെ എണ്ണത്തില്‍ വന്‍വര്‍ധനവ്. കഴിഞ്ഞ 24 മണിക്കൂറിനിടെ രാജ്യത്ത് 13,586 പുതിയ കോവിഡ് കേസുകളും 336 മരണങ്ങളുമാണ് റിപ്പോര്‍ട്ട് ചെയ്തത്. ഒറ്റ ദിവസത്തിനിടെ ആദ്യമായാണ് ഇത്രയും പേര്‍ക്ക് രോഗം സ്ഥിരീകരിക്കുന്നത്. ഇതോടെ ആകെ കോവിഡ് കേസുകളുടെ എണ്ണം 3,80,532 ആയി. രോഗം ബാധിച്ച്‌ മരിച്ചവരുടെ എണ്ണം 12,573 ആയി ഉയര്‍ന്നു. നിലവില്‍ 1,63,248 പേര്‍ ചികിത്സയിലാണ്. 2,04,711 പേര്‍ രോഗമുക്തരായി.
ഏറ്റവും കൂടുതല്‍ കേസുകളും മരണവും മഹാരാഷ്ട്രയിലാണ്. സംസ്ഥാനത്ത് ഇതുവരെ 1,20,504 പേര്‍ക്ക് രോഗം സ്ഥിരീകരിച്ചു. 5,751 പേരാണ് രോഗം ബാധിച്ച്‌ മരിച്ചത്. രോഗികളുടെ എണ്ണത്തില്‍ രണ്ടാം സ്ഥാനത്തുള്ള തമിഴ്നാട്ടില്‍ ആകെ രോഗികളുടെ എണ്ണം 52,334 ആയി ഉയര്‍ന്നു. ഇതുവരെ 625 മരണങ്ങള്‍ റിപ്പോര്‍ട്ട് ചെയ്തിട്ടുണ്ട്. ഡല്‍ഹിയില്‍ രോഗികളുടെ എണ്ണം 49,979 ആയി. 1,969 പേരാണ് ഇതുവരെ മരിച്ചത്.
25,601 കേസുകളുള്ള ഗുജറാത്താണ് നാലാം സ്ഥാനത്ത്. സംസ്ഥാനത്ത് ഇതുവരെ 1,591 പേരാണ് രോഗം ബാധിച്ച്‌ മരിച്ചത്. മഹാരാഷ്ട്ര കഴിഞ്ഞാല്‍ ഏറ്റവും കൂടുതല്‍ മരണം റിപ്പോര്‍ട്ട് ചെയ്തത് ഗുജറാത്തിലാണ്. ഉത്തര്‍പ്രദേശില്‍ രോഗികളുടെ എണ്ണം 15,181 ആയി. രാജസ്ഥാനില്‍ 13,857 കേസുകളും ബംഗാളില്‍ 12,735 കേസുകളും റിപ്പോര്‍ട്ട് ചെയ്തിട്ടുണ്ട്. ഓരോ ദിവസം കഴിയും തോറും രാജ്യത്ത് കോവിഡ് രോഗികളുടെ എണ്ണത്തില്‍ വര്‍ധനവ് രേഖപ്പെടുത്തുകയാണ്.