കൊട്ടാരക്കര : കേരളാ പോലീസ് ഓഫീസേഴ്സ് അസോസിയേഷന് കൊല്ലം റൂറല് ജില്ലാ കമ്മിറ്റി – കോവിഡ് വ്യാപനം തടയാന് സര്ക്കാര് പ്രഖ്യാപിച്ച ബ്രേക്ക് ദി ചെയിന് പ്രവര്ത്തനം ആരംഭിച്ചു.
ജില്ലയിലെ എല്ലാ പോലീസ് സ്റ്റേഷനുകളിലും ഓഫീസുകളിലും ജീവനക്കാരും പൊതുജനങ്ങളും പ്രവേശിക്കുന്നതിന് മുമ്പ് കൈകള് കഴുകുവാന് സൗകര്യം ഒരുക്കി. കോവിഡ് വ്യാപനം തടയുക എന്നതിലൂടെ ഒരു നല്ല ആരോഗ്യ ശീലം വളര്ത്തുന്നതിനുളള ഒരു ഉപാധി കൂടിയായി ഇത് മാറും. എല്ലാ പോലീസ് സ്റ്റേഷനുകളിലും ഓഫീസുകളിലും വിതരണം ചെയ്യുന്നതിനുളള സാനിട്ടൈസര്, മാസ്ക്ക്, ഗ്ലൗസ് എന്നിവ കെ.പി.ഒ.എ മുഖേന പോലീസ് സ്റ്റേഷനുകളില് എത്തിക്കും.
ഇടയ്ക്കിടെ കൈകള് സോപ്പും വെളളവും ഉപയോഗിച്ച് കഴുകുന്നതിനും, തുമ്മുമ്പോഴും ചുമയ്ക്കുമ്പോഴും വായും മൂക്കും തൂവാല കൊണ്ട് മൂടുക, സ്പര്ശനത്തോട് കൂടിയ ആശംസകള് ഒഴുവാക്കുക തുടങ്ങിയ ആരോഗ്യ ശീലങ്ങള് പാലിക്കുവാന് പോലീസ് ഉദ്യോഗസ്ഥരെയും പൊതുജനങ്ങളെയും പ്രാപ്തരാക്കാന് ഉതകുന്ന ബോധവത്ക്കരണ ക്യാമ്പയിന് കൊല്ലം റൂറല് ജില്ലാ ആസ്ഥാനത്ത് ജില്ലാ പോലീസ് മേധാവി ഹരിശങ്കർ IPS അവര്കള് ഉദ്ഘാടനം ചെയ്തു.
കോവിഡ് -19 മഹാമാരിയെ തടയാന് കരുതലോടെ മുന്നോട്ട് എന്ന ആശയം പൊതുജനങ്ങളിലും സഹപ്രവര്ത്തകരിലും എത്തിക്കാന് വേണ്ട പ്രവര്ത്തനങ്ങള് ഏറ്റെടുത്തത് അഭിനന്ദനാര്ഹമാണെന്നും, ജില്ലയിലെ എല്ലാ പോലീസ് ഉദ്യോഗസ്ഥര്ക്കും ആവശ്യമായ മുന്കരുതല് നടപടികള് എടുക്കാന് നിര്ദ്ദേശം നല്കിയിട്ടുളളതായും ഉദ്ഘാടന പ്രസംഗത്തില് ജില്ലാ പോലീസ് മേധാവി പറഞ്ഞു.