കൊല്ലം:പുത്തൂരില് അച്ഛനും അമ്മയ്ക്കും ഒപ്പം ഉറങ്ങിക്കിടന്ന അഞ്ച് വയസുകാരന് പാമ്പ് കടിയേറ്റ് മരിച്ചു. മാവടി ആറ്റുവാശേരി തെങ്ങുവിള മണി മന്ദിരത്തില് മണിക്കുട്ടന്റെ മകന് ശിവജിത്താണ് മരിച്ചത്. ഇന്ന് പുലര്ച്ചെ അഞ്ച് മണിക്കാണ് ശിവജിത്തിന് പാമ്പ് കടിയേറ്റത്. കാലില് എന്തോ കടിച്ചെന്ന് കുട്ടി അമ്മയെ അറിയിച്ചിരുന്നു. അമ്മ നോക്കിയപ്പോള് കുട്ടിയുടെ കാലില് രണ്ട് പാടുകളും ചോരയും വരുന്നത് ശ്രദ്ധയില്പെട്ടു. കാല് നീരു വച്ചു വീര്ത്തതിനെ തുടര്ന്നു താലൂക്ക് ആശുപത്രിലെത്തിച്ചെങ്കിലും ജീവന് രക്ഷിക്കാനായില്ല. മാവടി ജിഎല്പിഎസ് സ്കൂളില് എല്.കെ.ജി വിദ്യാര്ഥിയായിരുന്നു.
