കൊട്ടാരക്കര : ശബ്ദ മലിനീകരണത്തെ സംബന്ധിച്ച് കേരളാ ഹൈക്കോടതിയുടെ മാര്ഗ്ഗ നിര്ദ്ദേശങ്ങള് പാലിക്കുന്നതിന്റെ ഭാഗമായി കൊല്ലം റൂറല് ജില്ലയിലെ മൈക്ക് സെറ്റ് ഓപ്പറേറ്റര്മാരുടേയും, ഉടമകളുടേയും യോഗം 2020 ജനുവരി 6 ന് 12 മണി മുതല് കൊട്ടാരക്കര ഹോട്ടല് അമ്പലക്കരയില് വച്ച് നടന്നു.ഈ യോഗത്തില് കൊല്ലം റൂറല് ജില്ലയിലെ വിവിധ ഭാഗങ്ങളില് നിന്നുള്ള 200 ലധികം പേര് പങ്കെടുത്തു.
യോഗം അഢീഷണല് പോലീസ് സൂപ്രണ്ട് ബി വിനോദ് ഉത്ഘാടനം ചെയ്തു.
ശബ്ദ മലിനീകരണം സമൂഹത്തില് സൃഷ്ടിക്കുന്ന ഭവിഷത്തുകളെ സംബന്ധിച്ച് പുനലൂര് ഡി.വൈ.എസ്.പി അനില്ദാസ് ക്ലാസ് നയിച്ചു. തുടര്ന്ന് കോടതിവിധിയെ സംബന്ധിച്ചും, ശബ്ദമലിനീകരണം പൊതു ജനങ്ങളേയും, വിദ്യാര്ഥികളേയും, വൃദ്ധജനങ്ങളേയും, രോഗികള് തുടങ്ങി സമൂഹത്തിന്റെ വിവിധ മേഖലയിലുള്ള ജനങ്ങളുടെ സ്വൈര്യജീവിതത്തെ പ്രതികൂലമായി ബാധിക്കുന്നത് സംബന്ധിച്ച് ജില്ലാ പോലീസ് മേധാവി ഹരിശങ്കര് ഐ.പി.എസ് വിശദീകരിച്ചു. തുടര്ന്ന് സംശയങ്ങള്ക്ക് ജില്ലാ പോലീസ് മേധാവി മറുപടി നല്കി.
രണ്ടാംഘട്ടം എന്ന നിലയില് എല്ലാ പോലീസ് സ്റ്റേഷന് തലത്തില് വിവിധ ആഘോഷ കമ്മറ്റിക്കാരുടേയും, മൈക്ക് ഓപ്പറേറ്റര്/ ഉടമകളുടേയും സംയുക്ത യോഗം വിളിക്കുന്നതും, ശബ്ദമലിനീകരണം നിയന്ത്രിക്കേണ്ടതിന്റെ ആവശ്യകത ബോധ്യപ്പെടുത്തുന്നതും, ആയത് പാലിക്കുന്നതിനായി നിയമാനുസൃതമായ നോട്ടീസ് ബന്ധപ്പെട്ടവര്ക്ക് രേഖാമൂലം നല്കുന്നതുമാണ്.
ഇതിന് ശേഷവും ശബ്ദമലിനീകരണത്തെ സംബന്ധിച്ച് പരാതി ഉയര്ന്നാല് ബന്ധപ്പെട്ട ആഘോഷകമ്മറ്റി ഭാരവാഹികള്ക്കും, മൈക്ക് സെറ്റ് ഉടമ/ ഓപ്പറേറ്റര്മാര് എന്നിവര്ക്കെതിരെ കര്ശന നിയമ നടപടികള് സ്വീകരിക്കുകയും, മൈക്ക് സെറ്റ് കണ്ട് കെട്ടി കോടതിയില് സമര്പ്പിക്കുന്നതുമാണ്.
ഇത്തരത്തില് വിവിധ തലത്തില് കൂടി നിയമപരമായി ശബ്ദ മലിനീകരണം പൂര്ണ്ണമായും തടയുന്നതിനും അതുവഴി ഒരു പുതിയ സംസ്കാരം ജനങ്ങളില് വാര്ത്തെടുക്കുകയുമാണ് ഇത് കൊണ്ട് ലക്ഷ്യമിടുന്നത്. യോഗത്തില് കൊട്ടാരക്കര ഡി.വൈ.എസ്.പി നാസറുദ്ദീനും സംസാരിച്ചു.