തിരുവനന്തപുരം: ഷൊര്‍ണൂര്‍-കോഴിക്കോട് പാതയിലെ ഗതാഗതം പുനരാരംഭിച്ചതോടെ ദീര്‍ഘദൂര തീവണ്ടികളും ഓടിത്തുടങ്ങി. എന്നാല്‍ ഗതാഗതം പൂര്‍ണമായും ശരിയാകാന്‍ രണ്ടു ദിവസം കൂടി എടുക്കുമെന്നു റെയില്‍വേ അറിയിച്ചു. റെയില്‍വെ എന്‍ജിനിയര്‍മാര്‍ തിങ്കളാഴ്ച ഫറോക്ക് പാലം പരിശോധിച്ചു. പാളങ്ങള്‍ ഗതാഗതയോഗ്യമെന്ന് കണ്ടെത്തി. തുടര്‍ന്നാണ് ഏറനാട് എക്സ്പ്രസ് സ്പെഷല്‍ പാസഞ്ചറായി കടത്തിവിട്ടത്.
മംഗലാപുരത്തു നിന്നും തിരുവനന്തപുരത്തേക്കുമുള്ളതും തിരിച്ചുമുള്ള മാവേലി, മലബാര്‍ എക്സ്പ്രസുകളും പതിവു രീതിയില്‍ ഓടി. എറണാകുളം-ചെന്നൈ പാതയിലെ തിരക്ക് കണക്കിലെടുത്ത് പ്രത്യേക തീവണ്ടി തിങ്കളാഴ്ച രാത്രി സര്‍വീസ് തുടങ്ങി. ചൊവ്വാഴ്ച രാവിലെ 8.45-ന് എറണാകുളത്ത് എത്തും വിധത്തിലാണ് ട്രെയിന്‍ സര്‍വീസ് നടത്തുന്നത്. ചൊവ്വാഴ്ച വേണാട് ഉള്‍പ്പെടെയുള്ള തീവണ്ടികള്‍ ഓടുമെന്ന് തിരുവനന്തപുരം റയില്‍വെ അധികൃതര്‍ അറിയിച്ചു.
മഴക്കെടുതിയില്‍ ഇതുവരെ 83 പേരാണ് മരിച്ചത്. തിരുവനന്തപുരത്ത് രണ്ട് മത്സ്യത്തൊഴിലാളികള്‍ മരിച്ചു. പാലക്കാട് ഒരാള്‍ മുങ്ങിമരിച്ചു. 286 വീടുകള്‍ തകര്‍ന്നു. രണ്ടര ലക്ഷത്തിലധികം പേര്‍ ദുരിതാശ്വാസ ക്യാമ്ബിലാണ്.
