ചെങ്ങന്നൂര്: കാറോട്ടത്തിലെ ദേശീയ റെക്കോഡ് ജേതാവ് വിനു കുര്യന് ചെങ്ങന്നൂരില് സ്കൂട്ടര് അപകടത്തില് മരിച്ചു. കുറ്റൂര് താഴ്ചയില് ജേക്കബ് കുര്യൻ്റെ മകന് വിനു കുര്യന് ജേക്കബ് (25) ആണ് മരിച്ചത്. എന്ജിനീയറിങ് പഠനത്തിനുശേഷം തിരുവനന്തപുരത്ത് ക്വാളിറ്റി കണ്ട്രോള് പഠനം നടത്തുകയായിരുന്നു.
ബുധനാഴ്ച വെളുപ്പിനെ 12.30-ഓടെ പുത്തന്വീട്ടിപ്പടി റെയില്വേ മേല്പ്പാലത്തിന് സമീപമായിരുന്നു അപകടമെന്ന് പോലീസ് പറഞ്ഞു. ചെങ്ങന്നൂര് ഭാഗത്തുനിന്ന് തിരുവല്ല ഭാഗത്തേക്ക് പോകുകയായിരുന്നു വിനു. എതിര്ദിശയില് വന്ന ടൂറിസ്റ്റ് ബസുമായി കൂട്ടിയിടിച്ചാണ് അപകടം ഉണ്ടായത്. ഇടിയുടെ ആഘാതത്തില് തെറിച്ച സ്കൂട്ടര് ഒടിഞ്ഞുമടങ്ങി. പോലീസ് എത്തി ചെങ്ങന്നൂര് ജില്ലാ ആശുപത്രിയിലേക്ക് കൊണ്ടുപോയെങ്കിലും മരിച്ചു. മൃതദേഹം പോസ്റ്റുമോര്ട്ടത്തിനുശേഷം ബന്ധുക്കള്ക്ക് വിട്ടുനല്കി.