വാഷിങ്ടണ്‍: കിഴക്കന്‍ ചൈന കടലിനു മുകളില്‍ നിരീക്ഷണം നടത്തുകയായിരുന്ന അമേരിക്കന്‍ വിമാനത്തെ രണ്ടു ചൈനീസ് യുദ്ധ വിമാനങ്ങള്‍ തടഞ്ഞു. യുഎസ് നിരീക്ഷണവിമാനത്തിന് 300 അടി അടുത്ത് ചൈനീസ് പോര്‍ വിമാനം എത്തിയതായി അധികൃതര്‍ പറഞ്ഞു.
യുഎസ് ഇപി-3 എന്ന വിമാനത്തെയാണ് ചൈനീസ് പോര്‍ വിമാനങ്ങള്‍ ചേര്‍ന്ന് മാര്‍ഗതടസം സൃഷ്ടിച്ചത്. ചൈനീസ് വിമാനങ്ങളെത്തുന്നത് കണ്ട് തങ്ങളുടെ വിമാനം ദിശമാറ്റിയെന്നും യുഎസ് അധികൃതര്‍ പറഞ്ഞു. ഞായാറാഴ്ചയാണ് സംഭവം.
കഴിഞ്ഞ മെയ് മാസത്തിലും മേഖലയില്‍ നിരീക്ഷണം നടത്തുകയായിരുന്ന യുഎസ് വിമാനത്തിനു ചൈനയുടെ രണ്ട് സുഖോയ്-30 വിമാനങ്ങള്‍ ചേര്‍ന്നു മാര്‍ഗതടസം സൃഷ്ടിച്ചിരുന്നു.
തങ്ങളുടെ അതിര്‍ത്തിയോടു ചേര്‍ന്നു യുഎസ് നടത്തുന്ന നിരീക്ഷണപ്പറക്കലിനോടുള്ള അതൃപ്തിയാണു ചൈനയുടെ നടപടിക്കു പിന്നിലെന്നാണ് അനുമാനം.