തിരുവനന്തപുരം ശ്രീകാര്യം പാങ്ങപ്പാറയിൽ 17കാരനായ പ്ലസ് ടു വിദ്യാർത്ഥി അഭിരാം കൊല്ലപ്പെട്ട കേസിൽ നിർണായക തെളിവുകള് കണ്ടെത്തി. അഭിരാമിന്റെ ബെൽറ്റും ഫോണും അടക്കമുള്ള തെളിവുകളാണ് കണ്ടെത്തിയത്. കൊലപാതകം നടന്ന പുരയിടത്തിന്റെ തൊട്ടടുത്തുള്ള പുരയിടത്തിലെ കിണറ്റില് നിന്നാണ് ഇവ കണ്ടെടുത്തത്. സാധനങ്ങളെല്ലാം കല്ലില് കെട്ടിത്താഴ്ത്തിയ നിലയിലായിരുന്നു. അഭിരാമിന്റെ ഷര്ട്ടും കഴുത്തില് ഉണ്ടായിരുന്ന വെള്ളിമാലയും കണ്ടെടുത്തവയില് ഉൾപ്പെടുന്നു. രണ്ടാം പ്രതി ഉമറിനെ വീണ്ടും കസ്റ്റഡിയിലെടുത്ത് ചോദ്യം ചെയ്തതിനു പിന്നാലെയാണ് നിര്ണായക തെളിവുകള് കണ്ടെത്തിയത്
കിണർ വറ്റിച്ചാണ് പരിശോധന നടത്തിയത്. കഴക്കൂട്ടം അസിസ്റ്റന്റ് കമ്മീഷണറുടെ നേതൃത്വത്തിൽ ഫയർഫോഴ്സും സ്കൂബ ടീമും ചേർന്ന് കിണറിലെ വെള്ളം വറ്റിച്ചാണ് തെളിവുകൾ പുറത്തെടുത്തത്. 2026 നവംബർ 1-ന് വൈകുന്നേരം വീട്ടിൽ നിന്ന് പുറത്തുപോയ അഭിരാമിനെ, പിറ്റേന്ന് പാങ്ങപ്പാറയിലെ ആളൊഴിഞ്ഞ പറമ്പിൽ ചാക്കിൽ കെട്ടിയ നിലയിൽ മരിച്ച നിലയിൽ കണ്ടെത്തുകയായിരുന്നു. ഇൻസ്റ്റഗ്രാം വഴി സന്ദേശങ്ങളയച്ച് അഭിരാമിനെ ആളൊഴിഞ്ഞ സ്ഥലത്തേക്ക് വിളിച്ചുവരുത്തിയ ശേഷം വായിൽ തുണി തിരുകി ബെൽറ്റ് ഉപയോഗിച്ച് കഴുത്ത് ഞെരിച്ച് കൊലപ്പെടുത്തുകയായിരുന്നുവെന്ന് പോലീസ് കണ്ടെത്തി. കേസിൽ 17 വയസ്സുകാരനാണ് ഒന്നാം പ്രതി, രണ്ടാം പ്രതി ഉമർ മുഖ്താർ, രണ്ട് യുവതികൾ (ആനന്ദ, ഐശ്വര്യ) എന്നിവരടക്കം നാല് പേരെയാണ് പോലീസ് അറസ്റ്റ് ചെയ്തത്.
