വയനാട്: മീനങ്ങാടി ഗവ. ഹയർ സെക്കൻഡറി സ്കൂളിലെ വിനോദയാത്രയ്ക്കിടെ പ്രിൻസിപ്പൽ മദ്യപിച്ചെന്ന ആരോപണത്തിൽ വഴിത്തിരിവ്. പ്രിൻസിപ്പൽ ഷിബി കൃഷ്ണന്റെ രക്തപരിശോധനാ ഫലം നെഗറ്റീവായി. രക്തത്തിൽ മദ്യത്തിന്റെ സാന്നിധ്യം കണ്ടെത്താനായില്ലെന്നാണ് പരിശോധനാഫലം വ്യക്തമാക്കുന്നത്. എന്നാൽ സംഭവം നടന്ന് മണിക്കൂറുകൾക്കുശേഷമാണ് രക്തസാമ്പിൾ ശേഖരിച്ചതെന്നും അതിനാൽ പരിശോധനാഫലത്തിന്റെ വിശ്വാസ്യത പരിശോധിക്കണമെന്നുമാണ് ചില രക്ഷിതാക്കളുടെ വാദം.
അതേസമയം, പ്രിൻസിപ്പലിനെ പിന്തുണച്ച് വിദ്യാർഥികളും രംഗത്തെത്തി. വിനോദയാത്രയിൽ പങ്കെടുത്ത വിദ്യാർഥികൾ പ്രിൻസിപ്പൽ മദ്യപിച്ചെന്ന പരാതി ഉന്നയിച്ചിട്ടില്ലെന്നും തങ്ങളുടെ എതിർപ്പ് പി.ടി.എ പ്രസിഡന്റിനെതിരെയായിരുന്നെന്നും അവർ വ്യക്തമാക്കി. പി.ടി.എ പ്രസിഡന്റ് മദ്യപിച്ചതിനെത്തുടർന്ന് ബസിനുള്ളിൽ അസഹ്യമായ ഗന്ധമുണ്ടായെന്നും വിദ്യാർഥികൾ പരാതിപ്പെട്ടിരുന്നു. തുടർന്ന് അദ്ദേഹത്തെ ബസിൽനിന്ന് ഇറക്കിവിട്ടതോടെ പ്രശ്നം പരിഹരിച്ചുവെന്നാണ് വിദ്യാർഥികളുടെ വിശദീകരണം.
സംഭവത്തിൽ രക്ഷിതാക്കളും നാട്ടുകാരും സ്കൂളിന് മുന്നിൽ പ്രതിഷേധിച്ചിരുന്നു. പ്രിൻസിപ്പലിനെ വൈദ്യപരിശോധനയ്ക്ക് വിധേയനാക്കണമെന്നായിരുന്നു അവരുടെ ആവശ്യം. ഇതേത്തുടർന്ന് പൊലീസ് ഇടപെട്ട് അദ്ദേഹത്തെ ആശുപത്രിയിലെത്തിച്ച് പരിശോധനയ്ക്ക് വിധേയനാക്കി. അതേസമയം, സംഭവത്തിൽ ഹയർ സെക്കൻഡറി വിദ്യാഭ്യാസ വകുപ്പ് അന്വേഷണം ആരംഭിച്ചിട്ടുണ്ട്. പ്രിൻസിപ്പലിനെതിരായ ആരോപണങ്ങൾ അടിസ്ഥാനരഹിതമാണെന്നും തന്നെ അപകീർത്തിപ്പെടുത്താനുള്ള നീക്കങ്ങൾക്കെതിരെ നിയമനടപടി സ്വീകരിക്കുമെന്നും ഷിബി കൃഷ്ണൻ പ്രതികരിച്ചു.