മാഡ്രിഡ്∙ സ്പെയിനിലെ സെൻട്രൽ പ്രവിശ്യയായ ടോളിഡോയിൽ ബുധനാഴ്ച രാവിലെ രണ്ട് അതിവേഗ ട്രെയിനുകൾ കൂട്ടിയിടിച്ച് 64 പേർ കൊല്ലപ്പെട്ടു. അപകടത്തിൽ നിരവധി യാത്രക്കാർക്കു പരുക്കേറ്റതായാണ് റിപ്പോർട്ട്.
രാവിലെ 9മണിയോടെയാണ് അപകടം. ഒരേ ദിശയിൽ സഞ്ചരിക്കുകയായിരുന്ന ഒരു അതിവേഗ ട്രെയിൻ മുന്നിലുണ്ടായിരുന്ന മറ്റൊരു ട്രെയിന്റെ പിൻഭാഗത്ത് ഇടിക്കുകയായിരുന്നുവെന്ന് സ്പാനിഷ് സ്റ്റേറ്റ് ബ്രോഡ്കാസ്റ്ററായ ടിവിഇ റിപ്പോർട്ട് ചെയ്തു. ഇടിയുടെ ആഘാതത്തിൽ ട്രെയിനിന്റെ രണ്ട് ബോഗികൾ ട്രാക്കിൽനിന്നു പുറത്തായി.
ട്രെയിനുകൾ കൂട്ടിയിടിച്ചതിനെത്തുടർന്ന് മാഡ്രിഡ്-അന്ദലൂസിയ അതിവേഗ പാതയിലെ റെയിൽ ഗതാഗതം പൂർണമായി നിർത്തിവെച്ചതായി എഡിഐഎഫ് എക്സിലൂടെ സന്ദേശത്തിൽ അറിയിച്ചു. ഇതോടെ ഇരുനഗരങ്ങൾക്കുമിടയിലുള്ള റെയിൽ സർവീസുകൾ തടസ്സപ്പെട്ടു. രക്ഷാപ്രവർത്തകർ സംഭവസ്ഥലത്ത് എത്തി പരിക്കേറ്റവരെ വിവിധ ആശുപത്രികളിലേക്ക് മാറ്റി വരികയാണ്. രക്ഷാപ്രവർത്തനം പുരോഗമിക്കുകയാണെന്നും മരിച്ചവരുടെ എണ്ണം ഇനിയും ഉയരാൻ സാധ്യതയുണ്ടെന്നും അധികൃതർ അറിയിച്ചു.