പത്തനംതിട്ട: സ്കൂള് വിദ്യാര്ഥികള് സഞ്ചരിച്ച ഓട്ടോ തോട്ടിലേക്ക് മറിഞ്ഞ് ഉണ്ടായ അപകടത്തില് രണ്ട് കുട്ടികള് മരിച്ചു. കരുമാന്തോട് ശ്രീനാരായണ സ്കൂളിലെ മൂന്നാം ക്ലാസ് വിദ്യാര്ഥിനി തൂമ്പാക്കുളം സ്വദേശിനി ആദിലക്ഷ്മി(7) യദുകൃഷ്ണന്(4) എന്നിവരാണ് മരിച്ചത്.
ബുധനാഴ്ച വൈകുന്നേരം കോന്നി തേക്കുതോട് തൂമ്പാക്കുളത്ത് ഓട്ടോ തോട്ടിലേക്ക് മറിഞ്ഞാണ് അപകടം ഉണ്ടായത്. അപകടത്തില് ആദിലക്ഷ്മിയുടെ മരണം നേരത്തേ സ്ഥിരീകരിച്ചിരുന്നു. ഓട്ടോയില് ആകെ അഞ്ച് കുട്ടികള് ഉണ്ടായിരുന്നതായാണ് ആദ്യം കരുതിയിരുന്നത്. പരിക്കേറ്റ മറ്റ് കുട്ടികളെയും ഡ്രൈവറെയും പിന്നീട് ആശുപത്രിയില് പ്രവേശിപ്പിച്ചിരുന്നു. ഇതിന് പിന്നാലെയാണ് മറ്റൊരു വിദ്യാര്ഥിയായ യദുകൃഷ്ണനെ കാണാനില്ലെന്ന സംശയം ഉയര്ന്നത്. ഇതോടെ രാത്രിയിലും നാല് വയസുകാരനായി തിരച്ചില് നടത്തുകയായിരുന്നു. തുടര്ന്ന് രാത്രി എട്ടേകാലോടെയാണ് തോട്ടില് നിന്ന് യദുകൃഷ്ണന്റെ മൃതദേഹം കണ്ടെത്തിയത്.
വൈകുന്നേരം നാലിന് സ്കൂള്വിട്ട ശേഷം കുട്ടികളുമായി പോയ ഓട്ടോയാണ് അപകടത്തില്പ്പെട്ടത്. റോഡില് പാമ്പിനെ കണ്ടപ്പോള് അതിന് മുകളിലൂടെ കയറാതിരിക്കാനായി ഓട്ടോ വെട്ടിച്ചതോടെ നിയന്ത്രണംവിട്ട് തോട്ടിലേക്ക് മറിഞ്ഞെന്നാണ് വിവരം