മോട്ടോർ വാഹന ക്ഷേമ നിധി ബോർഡിന്റെ കുടിശ്ശിക നിവാരണ ക്യാമ്പുകളുടെ സംസ്ഥാനതല ഉദ്ഘാടനം തൊഴിൽ വകുപ്പ് മന്ത്രി വി. ശിവൻകുട്ടി തിരുവനന്തപുരം ശിക്ഷക് സദനിൽ നിർവഹിച്ചു. ഈ സർക്കാർ അധികാരത്തിൽ വന്നതിനുശേഷം മാത്രം 84,203 പേർക്ക് 347 കോടിയിലധികം രൂപയുടെ ആനുകൂല്യങ്ങൾ ക്ഷേമനിധി ബോർഡിലൂടെ നൽകിയതായി മന്ത്രി പറഞ്ഞു. ഈ സാമ്പത്തിക വർഷത്തിലെ ആദ്യ അഞ്ചു മാസങ്ങളിലായി 41,990 ആളുകൾ പുതുതായി അംഗത്വമെടുത്തത് പദ്ധതിയുടെ സ്വീകരണശേഷിയും കാര്യക്ഷമതയും തെളിയിക്കുന്നു.
മോട്ടോർ തൊഴിലാളികളുടെ അവകാശങ്ങളും ക്ഷേമവും ഉറപ്പാക്കുന്നതിനുള്ള ചരിത്രപ്രാധാന്യമുള്ള പദ്ധതി കേരള സർക്കാർ 1985-ൽ ആരംഭിച്ചു. പിന്നീട് 2005-ൽ പുതിയ നിയമത്തിന്റെ അടിസ്ഥാനത്തിൽ ക്ഷേമനിധി വികസിപ്പിച്ചു കൊണ്ടു വന്നപ്പോൾ, ഇന്ന് 12 ലക്ഷത്തിലധികം തൊഴിലാളികളും 15 ലക്ഷത്തിലധികം വാഹനങ്ങളും കേരള മോട്ടോർ തൊഴിലാളി ക്ഷേമനിധി ബോർഡുമായി ബന്ധപ്പെട്ട് നിൽക്കുന്നു എന്നത് വലിയ സന്തോഷകരമാണ്. തൊഴിലാളികളുടെ ജീവിതത്തിലും കുടുംബങ്ങളുടെ ഭദ്രതയിലും വലിയ മാറ്റം വരുത്തിക്കൊണ്ട് ക്ഷേമനിധി ബോർഡ് മികച്ച രീതിയിൽ ആനുകൂല്യങ്ങൾ വിതരണം ചെയ്തു വരുന്നു.
പെൻഷൻ, കുടുംബ പെൻഷൻ, ചികിത്സാധനസഹായം, മരണാനന്തര സ്കോളർഷിപ്പ്, വിവാഹധനസഹായം, ശവസംസ്കാര ധനസഹായം, വിദേശത്തുനിന്നു മടങ്ങിയവർക്ക് സഹായം തുടങ്ങി തൊഴിലാളികളുടെ ജീവിതത്തിന്റെ എല്ലാ ഘട്ടങ്ങളിലും സുരക്ഷിതത്വം നൽകുന്ന പദ്ധതികളാണ് ക്ഷേമബോർഡ് നടപ്പിലാക്കുന്നത്. കഴിഞ്ഞ ഏതാനും മാസങ്ങളിൽ ബോർഡിന്റെ പ്രവർത്തനങ്ങളെ കൂടുതൽ കാര്യക്ഷമമാക്കാൻ നിരവധി നടപടികളാണ് സർക്കാരിന്റെ നിർദ്ദേശപ്രകാരം മുന്നോട്ടു കൊണ്ടുപോയത്. പെൻഡിംഗ് ഫയലുകൾ തീർപ്പാക്കലിനായി പ്രത്യേക പദ്ധതി നടപ്പിലാക്കി. അവധി ദിവസങ്ങളിലുൾപ്പെടെ ഓഫീസുകൾ തുറന്ന് 5858 ഫയലുകൾ തീർപ്പാക്കി 37 കോടി രൂപയുടെ ആനുകൂല്യങ്ങൾ വിതരണം ചെയ്തു. സ്കൂളുകൾ തുറക്കുന്നതിനുമുമ്പ് തന്നെ കുട്ടികൾക്ക് സ്കൂൾ കിറ്റുകൾ നൽകി. അപേക്ഷകരിൽ അർഹത നേടിയവർക്കായി ലാപ്ടോപ്പ് വിതരണം ചെയ്യുന്നതിന് നടപടികൾ ആരംഭിച്ചു. ഫയലുകളുടെ ഡിജിറ്റൈസേഷനും ഡാറ്റാ എൻട്രിയും പുരോഗമിക്കുന്നു.