ചേര്‍ത്തല | ബെംഗളൂരുവിലെ നഴ്സിങ് കോളജില്‍ അഡ്മിഷന്‍ വാങ്ങിക്കൊടുക്കാമെന്ന് പറഞ്ഞ് പണം തട്ടിയ കേസില്‍ വയനാട് സ്വദേശി അറസ്റ്റില്‍. വയനാട് മീനങ്ങാടി കാര്യമ്പാടി കല്ലത്താണി വീട്ടില്‍ സാദിഖ് (29) നെയാണ് ചേര്‍ത്തല പോലീസ് എറണാകുളം ജില്ലയിലെ പനങ്ങാട് നിന്നും അറസ്റ്റ് ചെയ്തത്. ചേര്‍ത്തല സ്വദേശിയില്‍ നിന്നും മകന് ബെംഗളൂരു നഴ്സിംഗ് കോളജില്‍ അഡ്മിഷന്‍ വാങ്ങിക്കൊടുക്കാമെന്ന് പറഞ്ഞു വിശ്വസിപ്പിച്ച് 2022 ജൂലൈയില്‍ ബേങ്ക് അക്കൗണ്ട് മുഖേന പണം അയപ്പിച്ചു കൈപ്പറ്റുകയായിരുന്നു. എന്നാല്‍, അഡ്മിഷന്‍ ശരിയാക്കി നല്‍കാതിരിക്കുകയും പലതവണ ആവശ്യപ്പെട്ടിട്ടും പണം തിരികെ കൊടുക്കാതിരിക്കുകയും ചെയ്തതിനെ തുടര്‍ന്ന്, പണം നഷ്ടപ്പെട്ടയാള്‍ ചേര്‍ത്തല പോലീസ് സ്റ്റേഷനില്‍ പരാതി നല്‍കുകയായിരുന്നു.
കേസ് രജിസ്റ്റര്‍ ചെയ്തതിനെ തുടര്‍ന്ന് പല സ്ഥലങ്ങളിലായി മാറി താമസിക്കുകയായിരുന്ന പ്രതിയെ അന്വേഷണത്തിനൊടുവില്‍ പനങ്ങാട് നിന്നും പോലീസ് പിടികൂടുകയായിരുന്നു. ഇയാള്‍ക്കെതിരെ വയനാട് പനമരം പോലീസ് സ്റ്റേഷനില്‍ സമാന രീതിയിലുള്ള തട്ടിപ്പുകേസ് രജിസ്റ്റര്‍ ചെയ്തിട്ടുണ്ട്. കൂടാതെ കോഴിക്കോട് ജില്ലയിലെ പേരാമ്പ്ര, കൊടുവള്ളി എന്നീ പോലീസ് സ്റ്റേഷന്‍ പരിധികളിലും വയനാട് ജില്ലയിലെ സുല്‍ത്താന്‍ ബത്തേരി പോലീസ് സ്റ്റേഷന്‍ പരിധിയിലും ഇയാള്‍ ഇത്തരത്തിലുള്ള തട്ടിപ്പുകള്‍ നടത്തിയതായി പോലീസിനു വിവരം ലഭിച്ചിട്ടുണ്ട്.
സാമ്പത്തിക തട്ടിപ്പു കേസുകളിലെ പ്രതികളെ കണ്ടെത്തുന്നതിനായി ചേര്‍ത്തല അസിസ്റ്റന്റ് പോലീസ് സൂപ്രണ്ട് ഹരീഷ് ജെയിനിന്റെ നേതൃത്വത്തില്‍ പ്രത്യേക അന്വേഷണ സംഘം രൂപവത്കരിച്ചിരുന്നു. ചേര്‍ത്തല ഐ എസ് എച്ച് ഒ. ജി അരുണ്‍, എസ് ഐ. എസ് സുരേഷ്, വി ജെ ബിജുമോന്‍, എ എസ് ഐ. സജിത, സീനിയര്‍ സി പി ഒമാരായ എം ശ്രീജിത്ത്, രഞ്ചു സെബാസ്റ്റ്യന്‍ എന്നിവരടങ്ങിയ സംഘമാണ് പ്രതിയെ പിടികൂടിയത്. ചേര്‍ത്തല ജുഡീഷ്യല്‍ ഒന്നാം ക്ലാസ് കോടതി ഒന്നില്‍ ഹാജരാക്കിയ പ്രതിയെ 14 ദിവസത്തേക്കു റിമാന്‍ഡ് ചെയ്തു.