ന്യൂഡല്ഹി: ബാബരി മസ്ജിദ് ഒഴികെയുള്ള ഇന്ത്യയിലെ ആരാധനാലയങ്ങളുടെ മതപരമായ സ്വഭാവം നിലനിര്ത്തുന്ന ആരാധനാലയ സംരക്ഷണ നിയമംസംബന്ധിച്ച് സമസ്ത കേരള ജംഇയ്യത്തുല് ഉലമ നല്കിയ ഹരജി സുപ്രിംകോടതി ഇന്ന് പരിഗണിക്കും. ആരാധനാലയ നിയമത്തിന്റെ സാധുത ചോദ്യംചെയ്ത് സുപ്രിംകോടതി മുമ്പാകെ ഫയല് ചെയ്ത കേസില് പ്രസ്തുത നിയമത്തിന് അനുകൂല വാദം ഉന്നയിക്കുന്നതിന് സമസ്ത നല്കിയ ഹരജിയാണ് ഇന്ന് പരിഗണിക്കുന്നത്. ചീഫ് ജസ്റ്റിസ് സജ്ഞീവ് ഖന്ന, ജസ്റ്റിസുമാരായ പി.വി. സജ്ഞയ് കുമാര്, കെ.വി. വിശ്വനാഥന് എന്നിവരടങ്ങിയ ബെഞ്ച് മുമ്പാകെയാണ് കേസുള്ളത്. സമസ്തക്കു വേണ്ടി മുതിര്ന്ന അഭിഭാഷകന് പി.വി. ദിനേഷ്, അഭിഭാഷകരായ സുല്ഫീക്കര് അലി പി.എസ്, മുഹമ്മദ് ത്വയ്യിബ് ഹുദവി എന്നിവര് ഹാജരാവും.
അന്ജുമന് ഇന്തിസാമിയ മസ്ദിദ് കമ്മിറ്റി, സി.പി.എം എന്നീ വിഭാഗങ്ങളും കേസില് ഹരജി നല്കിയിട്ടുണ്ട്. കേന്ദ്രസര്ക്കാര് വിഷയത്തില് ഇതുവരെ നിലപാട് വ്യക്തമാക്കി സത്യവാങ്മൂലം സമര്പ്പിച്ചിട്ടില്ല.