മലപ്പുറം: തിരൂരങ്ങാടിയിൽ ഉടമകൾ അറിയാതെ ആർസിയിൽ പേരുമാറ്റിയ കേസിൽ മൂന്നുപേർ അറസ്റ്റിൽ. പരപ്പനങ്ങാടി ഉള്ളത്ത് കരുവാടത്ത് നിസാർ (43), കരുവങ്കല്ലിലെ നയീം (39), ചെട്ടിപ്പടി കോട്ടുവാളൻ്റെ പുരക്കൽ ഫൈജാസ് (28) എന്നിവരാണ് അറസ്റ്റിലായത്.
രണ്ടുപേരുടെയും സഹായത്തോടെ നിസാർ ആർസിയിൽ കൃത്രിമം നടത്തിയതായി പൊലീസ് കണ്ടെത്തി. വ്യാജ ആർസി ഉണ്ടാക്കാൻ തിരൂരങ്ങാടി സബ് ആർടി ഓഫീസിൽ നിന്ന് സഹായം ലഭിച്ചതായും നിസാർ പോലീസിന് മൊഴി നൽകിയിട്ടുണ്ട്. മൊഴിയുടെ അടിസ്ഥാനത്തിൽ സബ് ആർടി ഓഫീസിലേക്കും അന്വേഷണം നീങ്ങും.
വായ്പയെടുത്ത് അടവ് മുടങ്ങിയ വാഹനങ്ങള്‍ സ്വകാര്യ ധനകാര്യ സ്ഥാനങ്ങള്‍ പിടിച്ചെടുത്തിരുന്നു. ഈ വാഹനങ്ങളാണ് ഉടമസ്ഥരറിയാതെ അവരുടെ പേരില്‍ നിന്നും മാറ്റിയത്. ഇത് സംബന്ധിച്ച് അന്വേഷണം ആവശ്യപെട്ട് ജോയിന്‍റ് ആര്‍ ടി ഒ നല്‍കിയ പരാതിയില്‍ പൊലീസ് കേസെടുത്തിരുന്നു.