കോഴിക്കോട് ജില്ലയിൽ ദേശീയപാത വികസനം 2024 ൽ പൂർത്തിയാക്കാൻ കഴിയുമെന്നാണ് പ്രതീക്ഷിക്കുന്നതെന്ന് മന്ത്രി പി എ മുഹമ്മദ് റിയാസ്. മറ്റു തടസങ്ങളൊന്നുമില്ലെങ്കിൽ പ്രവൃത്തികൾ സമയബന്ധിതമായി പൂർത്തിയാക്കും. കലക്ട്രേറ്റ് കോൺഫറൻസ് ഹാളിൽ ചേർന്ന ദേശീയപാത അവലോകന യോഗത്തിൽ സംസാരിക്കുകയായിരുന്നു മന്ത്രി. മൂരാട് പാലം 2023 മാർച്ചിലും അഴിയൂർ- വെങ്ങളം, വെങ്ങളം-രാമനാട്ടുകര റീച്ചുകൾ 2024 ഏപ്രിലിലും പൂർത്തിയാക്കും. പ്രവൃത്തികൾ പൂർത്തിയാവുന്നതോടെ കോഴിക്കോടിന്റെ മുഖഛായ മാറുമെന്നും മന്ത്രി പറഞ്ഞു. കേരളത്തിൽ ദേശീയപാത വികസനം 2025 ൽ പൂർത്തീകരിക്കാൻ സാധിക്കും.
