യുക്രെയിനിലെ സുമിയിൽ നിന്ന് ഇന്ന് ന്യൂഡൽഹിയിലെത്തിച്ച മലയാളി വിദ്യാർഥികളടക്കമുള്ളവർ കേരളത്തിലേക്കു യാത്ര തിരിച്ചു. 247 പേരാണു മൂന്നു വിമാനങ്ങളിലായി ഡൽഹിയിലെത്തിയത്.ഡൽഹിയിൽനിന്നു കൊച്ചിയിലേക്ക് സംസ്ഥാന സർക്കാർ നോർക്ക റൂട്സിന്റെ നേതൃത്വത്തിൽ ഇന്ന് ഏർപ്പെടുത്തിയ ചാർട്ടേഡ് വിമാനത്തിൽ 180 പേർ വൈകിട്ട് 6.45നു കൊച്ചിയിലേക്കു തിരിച്ചു. ഇതിൽ എട്ടു പേർ യുക്രെയിനിലെ ഹാർകിവിൽനിന്നു മാർച്ച് 10നു ഡൽഹിയിൽ എത്തിയവരാണ്. ശേഷിക്കുന്നവർ ഇന്നു വൈകിട്ടും രാത്രിയുമായി ഡൽഹിയിൽനിന്നു കൊച്ചിയിലേക്കു പുറപ്പെടുന്ന ഇൻഡിഗോ, വിസ്താര വിമാനങ്ങളിൽ നാട്ടിലെത്തും.
