മൂന്നാര്‍: രാജമല പെട്ടിമുടിയിലെ കുവിയെന്ന നായ ഇനി പൊലിസ് ഡോഗ് സ്‌ക്വാഡില്‍. ദുരന്ത ഭൂമിയില്‍ പൊലിസിന് സഹായമായി മാറിയ നായയെ ഇടുക്കി ഡോഗ് സ്‌ക്വാഡിലേക്ക് ഏറ്റെടുത്തു.
രാജമലയിലെ ദുരന്തഭൂമിയില്‍ നിന്നും കളിക്കൂട്ടുകാരി ധനുഷ്‌കയുടെ ചേതനയറ്റ മൃതദേഹം കണ്ടെത്തിയ കുവിയെന്ന വളര്‍ത്തുനായ ഏവരുടെയും കണ്ണുകളെ ഈറനണിയിച്ചിരുന്നു. പെട്ടിമുടിയില്‍ മനുഷ്യനും വളര്‍ത്തു നായയുമായുള്ള സ്നേഹത്തിന്റെയും അത്മബന്ധത്തിന്റെയും പ്രതീകമായിരുന്നു ഈ കാഴ്ചകള്‍.
തന്റെ കളിക്കൂട്ടുകാരിയെ നഷ്ടപ്പെട്ട കുവി ദിവസങ്ങളോളം പെട്ടിമുടിയില്‍ അലഞ്ഞു തിരിഞ്ഞ് നടന്നിരുന്നു.
ദുരന്തഭൂമിയില്‍ തളര്‍ന്നുറങ്ങുന്ന കുവിയെ ശ്രദ്ധയില്‍പ്പെട്ട ജില്ല ഡോഗ് സ്‌ക്വാഡിലെ പരിശീലകനും സിവില്‍ പോലീസ് ഓഫീസറുമായ അജിത് മാധവനാണ് കുവിയെ പോലീസിലേയ്ക്ക് ഏറ്റെടുക്കാന്‍ നടപടി സ്വീകരിച്ചത്. പെട്ടിമുടിയില്‍ നിന്ന് കുവിയ്ക്ക് സ്നേഹാര്‍ദ്രമായ യാത്രയയപ്പാണ് പ്രദേശവാസികളും ജനപ്രതിനിധികളും ഉദ്യോഗസ്ഥരും ചേര്‍ന്ന് നല്‍കിയത്.