തിരുവന്തപുരം : കേരളത്തില് വിവിധയിടങ്ങളില് അടുത്ത ദിവസങ്ങളിലും അതിതീവ്ര മഴ ലഭിക്കാന് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. പൊതുജനങ്ങളോടും സര്ക്കാര് സംവിധാനങ്ങളോടും ഉരുള്പൊട്ടല്, മണ്ണിടിച്ചില്, താഴ്ന്ന പ്രദേശങ്ങളില് വെള്ളപ്പൊക്കം എന്നിവ മുന്നില് കണ്ടുള്ള തയ്യറെടുപ്പുകള് നടത്താനും അതീവ ജാഗ്രത പാലിക്കാനും സംസ്ഥാന ദുരന്ത നിവാരണ അതോറിറ്റി നിര്ദേശിച്ചിട്ടുണ്ട്.
കേന്ദ്ര കാലാവസ്ഥ നിരീക്ഷണ കേന്ദ്രം റെഡ് അലര്ട്ട് പ്രഖ്യാപിച്ച ജില്ലകള്: ഓഗസ്റ്റ് 9: ഇടുക്കി, മലപ്പുറം, വയനാട്. ഈ ജില്ലകളില് 24 മണിക്കൂറില് 204.5 മില്ലിമീറ്ററില് കൂടുതല് മഴ ലഭിക്കാനുള്ള സാധ്യതയുണ്ട്. ഇത്തരത്തില് അതിതീവ്ര മഴ ലഭിക്കുന്നത് അപകട സാധ്യത വര്ധിപ്പിക്കും.
ഓറഞ്ച് അലര്ട്ട് പ്രഖ്യാപിച്ച ജില്ലകള്: ഓഗസ്റ്റ് 9: കോഴിക്കോട്, കണ്ണൂര്, കാസര്ഗോഡ്, ഓഗസ്റ്റ് 10 : മലപ്പുറം, കണ്ണൂര്. ഒറ്റപ്പെട്ടയിടങ്ങളില് അതിതീവ്രമോ അതിശക്തമായതോ ആയ മഴക്കുള്ള സാധ്യതയാണ് പ്രവചിച്ചിരിക്കുന്നത്. 24 മണിക്കൂറില് 115.6 മുതല് 204.4 മില്ലീമീറ്റര് വരെ മഴ ലഭിച്ചേക്കും.
മഞ്ഞ അലര്ട്ട് പ്രഖ്യാപിച്ച ജില്ലകള്-ഓഗസ്റ്റ് 9 : ആലപ്പുഴ, കോട്ടയം, എറണാകുളം, തൃശൂര്, പാലക്കാട്. 10 : ആലപ്പുഴ, എറണാകുളം, ഇടുക്കി, തൃശൂര്, കോഴിക്കോട്, വയനാട്, കാസര്ഗോഡ്.11 : കോഴിക്കോട്, കണ്ണൂര്, കാസര്ഗോഡ്. ഒറ്റപ്പെട്ടയിടങ്ങളില് 24 മണിക്കൂറില് 64.5 മുതല് 115.5 മില്ലിമീറ്റര് വരെ ലഭിക്കുന്ന ശക്തമായ മഴയാണ് പ്രവചിക്കപ്പെട്ടിരിക്കുന്നത്.
