പാലക്കാട് : ലോക്ക്‌ഡൗണിന്റെ ഭാഗമായി സർക്കാർ ജനങ്ങൾക്ക്‌ നൽകുന്ന സൗജന്യ ഭക്ഷ്യധാന്യ കിറ്റുകൾ ജില്ലയിൽ 45656 റേഷൻ കാർഡുടമകൾ കൈപ്പറ്റി. അന്ത്യോദയ അന്ന യോജന വിഭാഗങ്ങൾക്കുള്ള (മഞ്ഞകാർഡ്‌) കിറ്റ്‌ വിതരണമാണ്‌ നടക്കുന്നത്‌. ഈ വിഭാഗത്തിൽപ്പെട്ട 2726 കിറ്റുകൾ മാത്രമാണ്‌ ഇനി വിതരണം ചെയ്യാനുള്ളത്‌.
ആലത്തൂർ– 4955, ചിറ്റൂർ–8599, മണ്ണാർക്കാട്‌–15008, ഒറ്റപ്പാലം–5434, പാലക്കാട്–6712, പട്ടാമ്പി–4948 എന്നിങ്ങനെയാണ്‌ താലൂക്ക്‌ തലത്തിൽ ഇതുവരെ വിതരണം ചെയ്‌തത്‌. എഎവൈ കാർഡുകൾക്കുള്ളത്‌ അടുത്ത ദിവസങ്ങളിൽ തന്നെ പൂർത്തിയാവും. തുടർന്ന് മുൻഗണന കാർഡുടമകൾക്കുള്ള (പിങ്ക്‌) 3,08, 792 കിറ്റുകൾ നൽകും. അതിനു ശേഷമായിരിക്കും മറ്റ്‌ കാർഡുകൾക്ക്‌ കിറ്റ്‌ നൽകുക.
മാവേലി സ്റ്റോറുകളിലും വിവിധ കേന്ദ്രങ്ങളിലും തയ്യാറാവുന്നതിനനുസരിച്ച്‌ കിറ്റുകൾ റേഷൻകടകളിൽ എത്തിച്ചുവരുന്നു.അതിനിടെ, സൗജന്യ റേഷൻ വിതരണം 95.47 ശതമാനം പൂർത്തിയായി. വ്യാഴാഴ്‌ച 12,278 പേർ റേഷൻ വാങ്ങി. ജില്ലയിലെ 943 റേഷൻ കടകളിലായി 7.47 ലക്ഷം റേഷൻ കാർഡുകളാണ്‌ ജില്ലയിലുള്ളത്‌. 20 ന്‌ ശേഷം എഎവൈ, മുൻഗണനാ കാർഡുകാർക്കുള്ള കേന്ദ്ര സർക്കാരിന്റെ സൗജന്യ റേഷൻ വിതരണം ആരംഭിക്കും.
