തൃശ്ശൂര്‍| തൃശ്ശൂര്‍ പൂരം വെടിക്കെട്ടിന് അനുമതി ലഭിക്കാത്തതില്‍ ആശങ്കയുണ്ടെന്ന് പാറമേക്കാവ് ദേവസ്വം സെക്രട്ടറി. കേന്ദ്രമന്ത്രി പിയൂഷ് ഗോയലിനെ ദേവസ്വങ്ങള്‍ നേരില്‍ കണ്ട് അഭ്യര്‍ഥിച്ചിട്ടും അനുകൂല മറുപടി ലഭിച്ചിട്ടില്ലെന്നും പാറമേക്കാവ് ദേവസ്വം സെക്രട്ടറി ജി രാജേഷ് പറഞ്ഞു. ഇത്തവണ മെയ് ആറിനാണ് തൃശ്ശൂര്‍ പൂരം. എന്നാല്‍ പൂരം വെടിക്കെട്ടിന് ഇതുവരെയും അനുമതി ലഭിച്ചിട്ടില്ല. വെടിക്കെട്ട് പ്രതിസന്ധിയിലാകുമോ എന്ന ആശങ്കയിലാണ് ദേവസ്വങ്ങളെന്ന് അദ്ദേഹം കൂട്ടിച്ചേര്‍ത്തു.
വെടിക്കെട്ട് അനുമതി ലഭിക്കുന്നതിന് തടസ്സമായി നില്‍ക്കുന്നത് കേന്ദ്ര നിയമമാണ്. കേന്ദ്ര മന്ത്രി പിയൂഷ് ഗോയലിനെ കണ്ട് കാര്യം ധരിപ്പിച്ചെങ്കിലും അനുകൂല മറുപടി ലഭിച്ചിട്ടില്ല. വെടിക്കെട്ട് പുരയില്‍ നിന്നും വെടിക്കെട്ട് നടത്തുന്ന സ്ഥലവും തമ്മില്‍ 200 ദൂരം വേണം എന്നുള്ളതാണ് പ്രധാന നിബന്ധന. ഫയര്‍ ലൈനില്‍ നിന്നും 100 മീറ്റര്‍ മാറി വേണം ആളുകള്‍ നില്‍ക്കാന്‍. 250 മീറ്റര്‍ പരിധിയില്‍ സ്‌കൂളുകളോ പെട്രോള്‍ പമ്പോ ഉണ്ടാകരുത്. ഈ നിയമങ്ങള്‍ പൂര്‍ണമായും പാലിച്ചുകൊണ്ട് വെടിക്കെട്ട് നടത്തുക പ്രയാസമാണെന്നും ജി രാജേഷ് പറഞ്ഞു.
പാറമേക്കാവ് തിരുവമ്പാടി വേലകള്‍ക്ക് ഈ നിയമങ്ങള്‍ പറഞ്ഞുകൊണ്ട് അനുമതി നിഷേധിച്ചിരുന്നു. ഹൈക്കോടതിയെ സമീപിച്ചാണ് അന്ന് ദേവസ്വങ്ങള്‍ വെടിക്കെട്ട് നടത്തിയതെന്നും കേന്ദ്രത്തില്‍ നിന്നും അനുകൂല നിലപാട് ഉണ്ടായില്ലെങ്കില്‍ ഹൈക്കോടതിയെ സമീപിക്കാനാണ് തീരുമാനമെന്നും ജി രാജേഷ് വ്യക്തമാക്കി.