റായ്പൂര്‍: ഛത്തീസ്ഡഗിലുണ്ടായ മാവോയിസ്റ്റ് ആക്രമണത്തില്‍ ഒന്‍പത് ജവാന്മാര്‍ക്ക് വീരമൃത്യു. ജവാന്മാര്‍ സഞ്ചരിക്കുകയായിരുന്ന വാഹനത്തിന് നേരെ മാവോയിസ്റ്റുകള്‍ ഐഇഡി സ്ഫോടക വസ്തു ഉപയോഗിച്ച് ആക്രമണം നടത്തുകയായിരുന്നു. ഇന്നുച്ചയ്ക്ക് 2.15 ഓടെ ബസ്റ്റര്‍ മേഖലയിലെ കുത്രുവിലാണ് സംഭവം.
ഇന്ന് രാവിലെ ഛത്തീസ്ഗഡിലെ അബുജ്മദില്‍ ഏറ്റുമുട്ടലില്‍ രണ്ട് സ്ത്രീകള്‍ ഉള്‍പ്പെടെ അഞ്ച് മാവോയിസ്റ്റുകളെ സുരക്ഷാ സേന വധിച്ചിരുന്നു. എ.കെ 47 ഉള്‍പ്പെടെയുള്ള ആയുധങ്ങളും സേനാംഗങ്ങള്‍ ഇവരില്‍ നിന്ന് പിടിച്ചെടുത്തു.
ഈ ഓപ്പറേഷനു ശേഷം ജവാന്മാര്‍ മടങ്ങവേയായിരുന്നു മാവോയിസ്റ്റ് ആക്രമണം. ജില്ലാ റിസര്‍വ് ഗാര്‍ഡിലെ എട്ട് ജവാന്മാരും ഡ്രൈവറുമാണ് വീരമൃത്യു വരിച്ചത്. ഇരുപതോളം അംഗങ്ങളാണ് വാഹനത്തിലുണ്ടായിരുന്നതെന്നാണ് വിവരം