കണ്ണൂര്‍: ആയിക്കരയില്‍ നിന്നും കാണാതായ മത്സ്യബന്ധന ബോട്ട് കണ്ടെത്തി. അഴീക്കല്‍ ഭാഗത്താണ് ബോട്ടുള്ളത്. ബോട്ടിലുള്ള മത്സ്യത്തൊഴിലാളികള്‍ സുരക്ഷിതരാണെന്ന് അധികൃതര്‍ അറിയിച്ചു. മൂന്ന് മലയാളികളും ഒരു ഒഡീഷ സ്വദേശിയുമായിരുന്നു ബോട്ടിലുണ്ടായിരുന്നത്.
ഈ മാസം 17ന് മത്സ്യബന്ധനത്തിനായി പോയ സഫാമോള്‍ എന്ന ബോട്ടാണ് കാണാതായത്. ബോട്ട് ഡ്രൈവര്‍ മലപ്പുറം സ്വദേശി പരപ്പനങ്ങാടി സ്വദേശി മുജീബ്, കോഴിക്കോട് സ്വദേശി കുര്യാക്കോസ്, തിരുവനന്തപുരം സ്വദേശി വര്‍ഗീസ്, ഒഡീഷ സ്വദേശി പ്രഭു എന്നിവരാണ് ബോട്ടിലുണ്ടായിരുന്നത്. പിന്നീട് ഇവരെ ഫോണില്‍ വിളിച്ചിട്ട് മറുപടി ലഭിച്ചിരുന്നില്ല.
ഡ്രൈവര്‍ മുജീബിന് ദേഹാസ്വാസ്ഥ്യം ഉണ്ടായതിനാല്‍ ഇവര്‍ ഉള്‍ക്കടലില്‍ കുടുങ്ങിയതായാണ് വിവരം. വ്യാഴാഴ്ച രാത്രി ഇവരെ ഫോണില്‍ ലഭിച്ചതോടെയാണ് ആശങ്കയ്ക്ക് വിരാമമായത്. മത്സ്യത്തൊഴിലാളികളെ തിരികെയെത്തിക്കാന്‍ മറൈന്‍ എന്‍ഫോഴ്‌മെന്‍റ് പുറപ്പെട്ടിട്ടുണ്ട്.നിലവില്‍ നാലുപേരും ആരോഗ്യവാന്‍മാരാണെന്നാണ് വിവരം.