പത്തനംതിട്ട: റാന്നിയിലെ കുടുംബ മദ്യപാനത്തിനിടെ യുവാവ് കൊല്ലപ്പെട്ട കേസിൽ സഹോദരനും സുഹൃത്തും അറസ്റ്റിൽ. യുവാവ് വീട്ടിനുള്ളിൽ കൊല്ലപ്പെട്ട നിലയിൽ കാണപ്പെട്ട സംഭവത്തിൽ പ്രതികളായ രണ്ടു പേരെ മണിക്കൂറുകൾക്കകമാണ് റാന്നി പോലീസ് പിടികൂടിയത്. റാന്നി മോതിരവയൽ വേങ്ങത്തടം വേങ്ങത്തടത്തിൽ വീട്ടിൽ ജോൺസന്റെ മകൻ ജോബിൻ ജോൺസൺ (28) കൊല്ലപ്പെട്ട കേസിലാണ് സഹോദരൻ ജോജോയും സുഹൃത്ത് പൊന്നു എന്ന് വിളിക്കുന്ന സുധീഷും അറസ്റ്റിലായത്.
ഞായറാഴ്ച രാത്രി ഒരുമിച്ചിരുന്നുള്ള മദ്യപാനത്തിനിടെയുണ്ടായ തർക്കമാണ് കൊലപാതകത്തിൽ കലാശിച്ചതെന്ന് പ്രതികൾ പോലീസിനോട് പറഞ്ഞു. കൊല്ലപ്പെട്ട ജോബിന്റെ ശരീരത്തിൽ പലയിടത്തും മർദ്ദനമേറ്റ പാടുകളുണ്ട്. തലയിൽ മുറിവേൽക്കുകയും ചെയ്തു.