പൊതുമരാമത്ത് വകുപ്പ് ഉടുമ്പൻചോല നിയോജക മണ്ഡലത്തിൽ നടപ്പിലാക്കിയ 5 പദ്ധതികളുടെ ഉദ്ഘാടനം പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് രാജാക്കാട്ടിൽ നിർവ്വഹിച്ചു. ഇടുക്കിയിൽ ഇനിയും വികസന പ്രവർത്തനങ്ങൾ ധാരാളമായി കൊണ്ടുവരേണ്ടതുണ്ടെന്നും അതിനായുള്ള ഇടപെടൽ ഉണ്ടാകുമെന്നും പി എ മുഹമ്മദ് റിയാസ് പറഞ്ഞു. നിർമ്മിക്കുന്ന റോഡുകൾ ഈടുനിൽക്കുന്നതാകണം. റോഡിന് ഉയർന്ന ഗുണനിലവാരമുണ്ടാകേണ്ട ജില്ലയാണ് ഇടുക്കി. നിർമ്മിക്കുന്ന റോഡുകളുടെ ഗുണനിലവാരം ഉറപ്പുവരുത്തേണ്ടതായുണ്ട്. അതിനായുള്ള കഠിനശ്രമമാണ് നടത്തുന്നത്. റോഡുകൾക്ക് ഡ്രൈനേജ് ആവശ്യമാണ്. അതിന് വിവിധ വകുപ്പുകളുടെ ഏകോപനത്തിനായി ശ്രമങ്ങൾ നടത്തുന്നു. മലയോര ഹൈവേയിൽ 89 കിലോമീറ്റർ ഇടുക്കിയിലൂടെയാണ് കടന്നു പോകുന്നത്. അതിൽ 78 കിലോമീറ്ററിൻ്റെ ഡി പി ആർ തയ്യാറായി കഴിഞ്ഞു. ജില്ലയുടെ ടൂറിസം സാധ്യതകൾ ആസൂത്രിതമായി നടപ്പിലാക്കി മുമ്പോട്ട് പോകണം. ടൂറിസത്തിന് വികാസമുണ്ടായാൽ നാട്ടിലെ സാധാരണക്കാരുടെ ജീവിതം മെച്ചപ്പെടും. ശുചിത്വവും പരിപാലനവും ടൂറിസം മേഖലക്ക് അനിവാര്യമാണെന്നും മന്ത്രി പറഞ്ഞു.
