ഇന്ത്യ എന്ന ആശയത്തിന്റെ അടിസ്ഥാനത്തിൽ ജനങ്ങളെ ഒന്നിച്ച് നിർത്തുന്നത് ഭരണഘടനയെന്ന ശക്തിയാണെന്ന് ധനകാര്യവകുപ്പ് മന്ത്രി കെ. എൻ. ബാലഗോപാൽ. ജില്ലാ പഞ്ചായത്ത് , ജില്ലാ ആസൂത്രണ സമിതി, കില എന്നിവ സംയുക്തമായി നടപ്പിലാക്കുന്ന ‘ദി സിറ്റിസണ്‍ 2022’ ഭരണഘടനാ സാക്ഷരത ക്യാമ്പയിനിന്റെ ജില്ലാതല ഉദ്ഘാടനം സി. കേശവന്‍ മെമ്മോറിയല്‍ ടൗണ്‍ ഹാളില്‍ നിര്‍വഹിക്കുകയായിരുന്നു അദ്ദേഹം.
ഭരണഘടനയെ സംരക്ഷിക്കുവാനും പഠിക്കുവാനും ഏറെ പ്രവർത്തനങ്ങൾ നാം നടത്തേണ്ടതുണ്ട്. അതിനായുള്ള പുതിയ ചുവടുവയ്പ്പിനാണ് ജില്ല നേതൃത്വം നൽകുന്നത്.
ഭരണഘടനയുടെ മൂല്യങ്ങൾ വെല്ലുവിളിക്കപ്പെടുന്ന ഒരു കാലഘട്ടത്തിലൂടെയാണ് നാം മുന്നോട്ട് പോകുന്നത്. രാജ്യത്തെ ശക്തിപ്പെടുത്തുന്ന പുതിയ ചുവടുവയ്പ്പാകും ജില്ലയിൽ ആരംഭിക്കുന്ന ഭരണഘടന സാക്ഷരതാ ക്യാമ്പയിൻ. മന്ത്രി പറഞ്ഞു. ജില്ലാ പഞ്ചായത്ത് പ്രസിഡന്റ് സാം. കെ. ഡാനിയല്‍ അധ്യക്ഷനായി. 2022 ഓഗസ്റ്റ് 14 ന് അർദ്ധരാത്രിയാണ് സമ്പൂർണ ഭരണഘടന സാക്ഷരത ജില്ലയുടെ പ്രഖ്യാപനം നടത്തുന്നത്.