തിരുവനന്തപുരം ∙ കേരളത്തിൽ ഇന്നും നാളെയും മഴയ്ക്കു സാധ്യത. ഇന്ന് കോട്ടയം, ഇടുക്കി, പത്തനംതിട്ട, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിലും നാളെ പത്തനംതിട്ട, കോട്ടയം, ഇടുക്കി, എറണാകുളം, പാലക്കാട്, മലപ്പുറം ജില്ലകളിലും യെലോ അലർട്ട് (ശക്തമായ മഴ) പ്രഖ്യാപിച്ചു. 20 മുതൽ മഴ കുറയും.അറബിക്കടലിലെ ന്യൂനമർദം കർണാടക–ഗോവ തീരത്തേക്കു നീങ്ങിയതോടെ കേരള തീരത്തു പടിഞ്ഞാറൻ കാറ്റ് ദുർബലമായി. ബംഗാൾ ഉൾക്കടലിലെ ന്യൂനമർദം നാളെ തമിഴ്നാട്–ആന്ധ്ര തീരത്ത് എത്തുമെന്നാണു സൂചന. കേരള, കർണാടക, ലക്ഷദ്വീപ് തീരങ്ങളിൽ മത്സ്യബന്ധനത്തിനു തടസ്സമില്ല.
