കോട്ടയം: നൂതന സാങ്കേതിക വിദ്യ ഉപയോഗപ്പെടുത്തി എല്ലാ വ്യക്തിക്കും വാതിൽപ്പടി സേവനം ഉറപ്പാക്കുകയാണ് സർക്കാരിന്റെ ലക്ഷ്യമെന്ന് സഹകരണ-രജിസ്‌ട്രേഷൻ വകുപ്പ് മന്ത്രി വി.എൻ. വാസവൻ. മീനച്ചിൽ ഗ്രാമപഞ്ചായത്ത് പുറത്തിറക്കുന്ന സമഗ്ര പൗരാവകാശ രേഖ പ്രകാശനം ചെയ്തു പ്രസംഗിക്കുകയായിരുന്നു മന്ത്രി.
ഇ സേവന സംവിധാനങ്ങൾ മുഖേന ആളുകൾക്ക് വീട്ടിലിരുന്ന് അപേക്ഷകൾ നൽകാൻ അവസരമുണ്ട്. സമയബന്ധിതമായി സേവനങ്ങൾ ജനങ്ങളിലേക്കെത്തിക്കുകയാണ് പ്രധാനം. സർക്കാർ സേവനങ്ങൾ എങ്ങനെ ലഭിക്കുമെന്നറിയാത്ത ഒരു വിഭാഗം ജനങ്ങൾ ഇപ്പോഴുമുണ്ട്. അവർക്ക് ഉപയോഗപ്രദമാകുന്ന രീതിയിലാണ് മീനച്ചിൽ ഗ്രാമ പഞ്ചായത്ത് പൗരാവകാശ രേഖ തയാറാക്കിയിരിക്കുന്നതെന്ന് അദ്ദേഹം പറഞ്ഞു. പഞ്ചായത്തിലെ എല്ലാ വീടുകളിലും ഇത് എത്തിക്കാനുള്ള നടപടി അഭിനന്ദനാർഹമാണെന്നും മന്ത്രി പറഞ്ഞു.