കെഎസ്ആര്‍ടിസി കര്‍ണ്ണാടകയിലേയ്ക്കുള്ള സര്‍വ്വീസ് വീണ്ടും തുടങ്ങുന്നു. ബംഗളുരു സര്‍വ്വീസുകള്‍ ഞായറാഴ്ച വൈകുന്നേരം മുതല്‍ തുടങ്ങുമെന്ന് മന്ത്രി ആന്റണി രാജു അറിയിച്ചു. കേരളത്തില്‍ നിന്നും ബംഗളുരുവിലേക്കുള്ള കെഎസ്ആര്‍ടിസി സര്‍വ്വീസുകള്‍ തുടങ്ങാന്‍ കേരളം നേരത്തേ തന്നെ സന്നദ്ധത അറിയിച്ചിരുന്നു. കര്‍ണ്ണാടകയും അനുമതി നല്‍കിയതോടെയാണ് സര്‍വ്വീസുകള്‍ പുനരാരംഭിക്കുന്നത്.
കേരളത്തില്‍ നിന്നുള്ള സര്‍വ്വീസുകള്‍ ഞായറാഴ്ച മുതല്‍ ആരംഭിക്കുമെന്ന് ഗതാഗത മന്ത്രി ആന്റണി രാജു അറിയിച്ചു. തിരുവനന്തപുരം, കോഴിക്കോട്, കണ്ണൂര്‍ എന്നിവിടങ്ങില്‍ നിന്നുമാണ് ആദ്യഘട്ടത്തില്‍ ബസുകള്‍ സര്‍വ്വീസ് നടത്തുക. തിരുവനന്തപുരത്ത് നിന്നുള്ള സര്‍വ്വീസുകള്‍ ജൂലൈ 11 ഞായര്‍ വൈകുന്നേരം മുതലും, കണ്ണൂര്‍, കോഴിക്കോട് നിന്നുള്ള സര്‍വ്വീസുകള്‍ ജൂലൈ 12 തിങ്കളാഴ്ച മുതലും ആരംഭിക്കും. അന്തര്‍സംസ്ഥാന ഗതാഗതത്തിന് തമിഴ്‌നാട് അനുമതി നല്‍കാത്ത സാഹചര്യത്തില്‍ കോഴിക്കോട് , കണ്ണൂര്‍ വഴി കര്‍ണ്ണാടകയിലേയ്ക്കുള്ള സര്‍വ്വീസുകളാണ് കെഎസ്ആര്‍ടിസി നടത്തുക. യാത്ര ചെയ്യേണ്ടവര്‍ കര്‍ണ്ണാടക സര്‍ക്കാരിന്റെ കോവിഡ് പ്രോട്ടോകോള്‍ പ്രകാരമുള്ള 72 മണിക്കൂര്‍ മുന്‍പുള്ള ആര്‍ടിപിസിആര്‍ ടെസ്റ്റ് നടത്തിയ നെഗറ്റീവ് സര്‍ട്ടിഫിക്കറ്റോ, ഒരു ഡോസ് വാക്‌സിന്‍ എടുത്തതിന്റെ സര്‍ട്ടിഫിക്കറ്റോ യാത്രയില്‍ കരുതണം.
തിരക്കു കണക്കിലെടുത്തായിരിക്കും സര്‍വ്വീസുകള്‍ നടത്തുക. കൂടുതല്‍ യാത്രക്കാര്‍ ആവശ്യപ്പെട്ടാല്‍ അധിക സര്‍വ്വീസുകള്‍ നടത്തും. ഈ സര്‍വ്വീസുകളുടെ സമയ വിവരവും, ടിക്കറ്റുകളും www.online.keralartc.com എന്ന വെബ് സൈറ്റിലൂടെയും ‘Ente KSRTC’ എന്ന മൊബൈല്‍ ആപ്പിലൂടെയും മുന്‍കൂട്ടി റിസര്‍വ്വ് ചെയ്യാവുന്നതാണ്.